Ус зайлуулах шугамын нөхцөл байдалтай холбоотой асуудлаар Нийслэлийн ЗДТГ-ын хэвлэлийн төлөөлөгч Н.Сугар мэдээлэл хийлээ.

Тэрбээр “2020 оны судалгаагаар нийслэлийн хэмжээнд 25 байршилд ус зайлуулах шугам сүлжээ хийх шаардлагатай гэсэн тооцоо гарсан. Үүнээс хойш 11 байршилд шинээр ус зайлуулах шугам сүлжээ хийсэн. Тахилтын гарцад уулнаас маш их хэмжээний ус орж ирсэн. Үүнд ус зайлуулах шугам байхгүй учир тийм асуудал үүссэн. Маш их хэмжээний хог урссан. Улаанбаатар хот хогондоо дарагдсан байна гэх шүүмжлэл гарсан. Тухайн уулын амууд бол модтой амууд байдаг. Тэнд иргэд аялж, зугаалж, хогоо ил задгай хаях үйлдлүүд гарсан. Энэ хогууд нөлөөлсөн. Гэхдээ энэ их хэмжээний бол биш. Үер урссан зам дээр түүхий эд худалдаж авдаг зургаан цэг байсан юм билээ. Тэдгээр цэгийн гадаа байсан хуванцар савууд урссан.

Маш их хэмжээний шороо, чулуу, хог хуримтлагдсан байна. Сүүлийн хоёр хоногийн хугацаанд 200 гаруй хүн ажилласан. Өнөөдрийн байдлаар төмөр хашааны дагуу хуримтлагдсан хогийг цэвэрлэхээр 40 гаруй хүн ажиллаж байна. Нийт гурван өдрийн турш 300-аад хүн ажиллаж байна. Улаанбаатар хотын хэмжээнд 461 км урттай ус зайлуулах шугам сүлжээ хэрэгтэй байдаг. Үүнээс 209 км шугам сүлжээ бий. 2040 оноос өмнө шаардлагатай байгаа шугам сүлжээг тавьж дуусгана гэсэн зорилт тавиад ажиллаж байна. Өнгөрсөн хугацаанд ус зайлуулах шугамгүйгээр авто замууд тавигдаж ирсэн. Одоо бол шинээ тавигдаж буй замууд ус зайлуулах шугамтай тавигдаж байна” гэв.

Д.Батчулуун