Өнөөдөр Зүүн хойд Азийн аюулгүй байдлын талаарх “Улаанбаатарын яриа, хэлэлцээ” олон улсын аюулгүй байдлын талаарх бага хурал болж байна. Энэхүү хэлэлцээнд олон улсын 150 гаруй зочид, төлөөлөгчид оролцож байгаа бөгөөд бүс нутгийн аюулгүй байдлын талаар хоёр хоног хэлэлцэх юм.

Энэ талаар Гадаад хэргийн сайд Б.Батцэцэг ""Улаанбаатарын яриа, хэлэлцээ" 2013 оноос эхлэн хэрэгжих болсон. Түүнээс хойш долоо дах хурлыг биечилсэн хэлбэрээр хийж байна. Жил ирэх тутамд олон улсын оролцоо нэмэгдэж байна. Өөрөөр хэлбэл бүс нутгийн аюулгүй байдлын асуудлаар яриа хэлэлцээг олон оронтой хамтран үргэлжлүүлж байгаа нь зорилгоо биелүүлсэн хэрэг. Түүнчлэн Хойд Америк, Ази, Номхон далайн бүсийн орнууд, Европын холбооны улсууд энэ бага хуралд оролцдог болсон нь чухал. Энэхүү хуралд зөвхөн улсын засгийн газрын хүрээнд бус эрдэмтэн судлаачдыг оролцуулдаг болсон нь харагдаж байна. Энэ нь саашаалтай.

“Улаанбаатарын яриа хэлэлцээ” нь өнөөгийн цаг үеийн нөхцөл байдалтай холбоотой улс орны аюулгүй байдлын тухай болон цаашлаад дэлхийн энх амгалан байдалд хэрхэн өөрсдийн хувь нэмрийг оруулах вэ гэдэг талбар болсон гэдгийг өнөөдрийн хурал баталж байна" гэв.

Т.Мөнхжаргал