Ардчилсан намаас цаг үеийн нөхцөл байдлын талаар мэдээлэл хийлээ. Өнөөдрийн мэдээллээр Монгол Улсын Үндсэн хуульд нэмэлт, өөрчлөлт оруулах талаар болон нийгэм, эдийн засагт үүссэн хүнд нөхцөл байдалд УИХ, Засгийн газар хариуцлага хүлээж, огцрохыг шаардлаа.

АН-ын Ерөнхий нарийн бичгийн дарга Ч.Өнөрбаяр “Л.Оюун-Эрдэнэ, Ц.Нямдорж хоёр хүний нэг нь манай улсын гал тогоог, нөгөөх нь уураг тархийг нь барьж байна. Гэвч улс удирдахад ухаан зарах хэрэгтэй гэдгийг одоо хүртэл ойлгоогүй байна. М.Энхболдыг тайзнаас нь буулгасан шиг, Н.Номтойбаярыг намаасаа хөөсөн шигээ улс удирдаж болохгүй. Засгийн газрын ухааны хөвч хоёр жилийн хугацаанд тасарлаа. Хилээ нээж эдийн засгийг идэвхжүүлэхэд ухаан зарах хэрэгтэй болохоос хувийн өс хонзонгоор ард түмний асуудлыг шийдэж болохгүй. Ухаан зарж чадахгүй бол ард түмэндээ гай болохгүй суудлаа тавьж өгөх хэрэгтэй. Өнөөдөр МАН боловсон хүчин, хүний нөөцөөр хахаж цацаж байгаагаа гайхуулдаг. Гэтэл Ерөнхий сайд хийх аавын хүү Л.Оюун-Эрдэнээс өөр алга уу? Ц.Нямдоржоос өөр гал тогоо барих хүн алга уу? Ц.Нямдорж бол "шоронжсон хууль"-ийг хийж чаддаг хүн. Засгийн газрыг ажлыг нь хийлгүүлж чадахгүй бол УИХ тарах хэрэгтэй" гэв.