Одоогоос зургаан жилийн өмнө Дарханы замыг дөрвөн эгнээтэй, стандарт хангасан нэгдүгээр зэрэглэлийн зам тавина хэмээн тухайн үеийн Зам, тээврийн яамныхан тууз хайчлан, хуучин замыг хуулж хаяж байлаа. Өндөр ачаалалтай үедээ өдөрт 7000, жирийн үед 4000 орчим машин өдөрт зорчдог энэ замаар зорчигчдын зовлон тууз хайчилсан энэ үеэс эхэлсэн. Энхэл донхол энэ замд хэчнээн хүн амиа өргөж, хэд нь машинаа эвдсэн тухай тоо баримт өдгөө өдөр ирэх тусам зузаарсаар байна.

Тууз хайчлалцсан дэд сайд нь “Ганцхан жил тэсчих” тэгээд л шил толь шиг толийсон замаар зорчино хэмээн бардам ам өгч байсан ч зургаан жилийн дараа тэр хүн “Шалдан гуя” л байж дээ гэдэг нь харагдаж байна. Зургаан жилийн дараа зуун км ч ахиагүй энэ замыг одоогийн ажил хариуцаж байгаа Л.Халтар сайд “үйлийн үрээр зууралдсан зам” гэж хэлсэн.

Замыг дуустал дэд сайдаа Дарханы зам дээр ажиллаж, амьдар гэж үүрэгдсэн. Үүнээс нь хойш олон сар өнгөрсөн ч Зам тээврийн яамныхан Дарханы замыг хурдлуулахыг шаардсан УИХ-ын гишүүдийн эсрэг пиар хийхээс өөрөөр ажил хийсэнгүй. Өдөр бүр энэ замд осол гарч, өчнөөн олон хүн амь нас, эд хөрөнгөөрөө хохирч байгаа ч хоёр сайд л ховхорсонгүй. Дарханы замын үйлийн үрийг дарга биш, иргэд л үүрч байна. Гэтэл ердөө хоёр гуравхан хоногийн өмнө Дарханы замын ажил яагаад дуусдаггүйн гол шалтгаан гарч ирэв.

Хэдхэн хоногийн өмнө Монгол Улсын Ерөнхийлөгч У.Хүрэлсүх Эрдэнэтийг зорьж “Эрдэнэт үйлдвэр” ТӨҮГ-ын 100 сая мод тарьж ургуулах зорилтын хүрээнд мод үржүүлгийн “Эрдэнэт” цогцолборын нээлтэд оролцсон.

Уг нь эгэл жирийн иргэд бол Эрдэнэт рүү Дарханы замаар долоо найман цаг сэгсчүүлж явдаг. Харин манай улсын Ерөнхийлөгч нисдэг тэрэгтэй очиж нээлт хийгээд л буцжээ. “Ачит ихт”-ийн тусгай талбайд нисдэг тэрэгтэйгээ тосуулж, үдүүлж байгаа төрийн тэргүүн Дарханы замд сэтгэл чилээхгүй нь аргагүй.

Дарга нар амь нас, эд хөрөнгөөрөө дэнчин тавьж иргэд шигээ энэ замаар зорчдоггүй болохоор Дарханы зам даанч удаан үргэлжлээд байгаа юм байна. Дарга явдаг болсон цагт л Дарханы зам дуусах юм байна. Эрхэм Ерөнхийлөгч Та Эрдэнэт рүү дараа очихдоо Дарханы замаар нэг яваад үзээрэй. Энэ замаар зорчдог иргэн бүрийн тань гуйлт гэж ойлгоорой.

О.Балдан-Очир