Өчигдөр Тосонцэнгэл- Улиастай чиглэлийн Загастайн давааны 67 км хатуу хучилттай автозамын нээлтийн ажиллагаа болсон. Энэ үеэр сэтгүүлчид Монгол Улсын Ерөнхий сайд Л.Оюун-Эрдэнээс баяр наадмын үеэр БНХАУ-аас их хэмжээний зээл авах талаар дараах  мэдээллийг тодрууллаа.

-Баяр наадмын үеэр БНХАУ-аас их хэмжээний зээл авна, өрөндөө Өмнөговь аймгийн хилийн боомтыг өгнө гэх мэдээлэл хэвлэл мэдээллийн хэрэгслээр явсан. Энэ тал дээр та Ерөнхий сайдын хувьд тайлбар өгөөч?

-Товчхондоо Гашуунсухайтын төмөр замыг гацаасан буюу Тавантолгойн амнаас хямд нүүрс авч хилийн үнээр зарахгүй байх сонирхолтой хэсэг бүлэг хүмүүс бий. Энэ хүмүүсийн эрх ашиг тодорхой хэмжээнд хөндөгдөж эхэлж байгаа. Учир нь тэнд шалгалт явагдаж байгаа.

Өнгөрсөн 30 жилийн хугацааны алдаа завхралыг засах гэж нэлээн юм болж байна. Өмч хувьчлалтай холбоотой, Хөтөл болон Дарханы төмөрлөгийн үйлдвэртэй холбоотой зарим асуудлууд бий. Материалыг нь аваад үзвэл энэ хувьчлал биш цэвэр луйврын шинж чанартай, албаар ашиггүй ажилласан балансыг үүсгэж байгаад хэсэг бүлэг хүмүүс авсан асуудал буцаж цэгцлэгдэж байна. Мэдээж энэ асуудал дээр олон хүний эрх ашиг зөрчигдөж байгаа. Гашуунсухайтын төмөр зам тавина гэхээр нүүрс тээвэрлэдэг хүмүүсийн хувьд эрх ашиг хөндөгдөж байгаа.

Ингээд л нэг юм болохоор олон нийтийн анхаарлыг хандуулах гэсэн акц болж байгаа. Би хэлэхэд тийм асуудал огт байхгүй, байх ч боломжгүй. Ийм асуудал гаргалаа гээд би зорилгоосоо огт ухрахгүй. Тиймээс нөгөө хүмүүст хандаж хэлэхэд хайран цагийн гарз.

Тавантолгойтой холбоотой луйврын асуудал удахгүй зогсоно. Ингэснээр Монгол Улсын эдийн засаг хоёр дахин нэмэгдэнэ. Эрдэнэт үйлдвэр төрд ирсэн нь зөв, буруу гээд байгаа, гэхдээ тоо нотолдог. Эрдэнэт үйлдвэр 300-350 тэрбум төгрөгийг улсын төсөвт төвлөрүүлдэг байсан. Одоо 1.2 их наядыг төвлөрүүлж байна. Энэ бол ердөө тооны зөрүү. Яг үүнтэй адил Гашуунсухайтын төмөр зам тавиад, хил холбох терминал хийгээд, аман дээрээс зарж байгаа нүүрсийг зөвхөн хил дээр зарахад л үнэ нь хоёр дахин нэмэгдэнэ. Тиймээс энэ их далд эдийн засаг ил болно. Болохоос ч өөр арга байхгүй. Боомтууд цаашид цахим хэлбэрт шилжинэ. Жишээлбэл, нүүрсэн дээр зохион байгуулалттай, дугааргүй машинаар нүүрс гаргадаг асуудал гарч байна. Энэ асуудал мөн удахгүй ил болно. Өнгөрсөн 30 жилд сайн зүйл ч байсан, саар зүйл ч байсан. Хөгжлийн банканд үүссэн асуудал ч тэр амаргүй байсан. Гэхдээ цэгцрээд дуусаж байна.

Удахгүй хэдхэн сарын асуудал үлдэж байна. Цаашдаа Монгол Улс ийм завхралгүй байх хэрэгтэй. Монгол улсад 38 орчим их наяд төгрөг эргэлддэг. Үүнийг бид яаж 100, 120 их наяд төгрөг болгох вэ гэдэгт төвлөрөх ёстой. Үүний нэг том асуудал бол боомтуудаа холбох, аж үйлдвэрээ хөгжүүлэх гэсэн зорилт тавьж байгаа. Том хөтөлбөр хэрэгжих бүрт жижиг эрх ашгууд хөндөгддөг. Үүнийг бид ойлгож, ярилцаад урагшлах ёстой, ухарч болохгүй” гэв.

Т.Мөнхжаргал