Засгийн газрын хуралдаанаас гарсан шийдвэрийг танилцуулж байна. Төрийн өмчийн бодлого, зохицуулалтын газрын дарга Б.Цэнгэл дараах мэдээллийг өглөө.

Тэрбээр "Төрийн бүтээмжийн бодлогын хүрээнд төрийн болон төрийн өмчийн оролцоотой компанийн засаглалыг сайжруулах, менежментийг боловсронгуй болгох, компанийн бүтэц орон тоог өнөөгийн нөхцөл байдалд нийцүүлэн цомхон чадварлаг болгох тухай асуудал чухал сэдэв болж байгаа.

Энэ хүрээнд 2022-2023 онд Монгол Улсын хөрөнгийн биржээр дамжуулан олон нийтэд нээлттэй, олон нийтийн хяналтад оруулах 25 компанийн асуудлыг УИХ, Засгийн газарт өргөн барьж, УИХ үндсэн чиглэлийг баталж өгсөн. Харин өнөөдрийн Засгийн газрын хуралдаанаар эдгээр 25 аж ахуй нэгжийг баталлаа.

Ингэснээр Монгол Улсын хөрөнгийн биржээр дамжуулан олон нийтэд нээлттэй хувьцаат компани болгох асуудлыг цаг хугацааны төлөвлөгөө гаргаж ажиллах боломж бүрдэж байгаа юм.

Үүнд,

1. Монголын хөрөнгийн бирж

2. Монголын цахилгаан холбоо

3. Үндэсний давхар даатгал

4. Мэдээлэл холбооны сүлжээ

5. Мэдээлэл технологийн үндэсний парк болон бусад 20 төрийн өмчит компаниудын 34 хүртэлх хувийг нээлттэйгээр олон нийтийн хяналттай болгохоор эхлүүллээ.

2022 оны дөрөвдүгээр улиралд багтаан Монголын хөрөнгийн биржийн 34 хүртэлх хувийг олон нийтийн өмчид нээлттэй болгох санал оруулж дэмжигдлээ. Улмаар 2023 оны нэгдүгээр улиралд багтаан Монголын цахилгаан холбоо, Үндэсний давхар даатгал компанийн 34 хүртэлх хувийг олон нийтэд нээлттэй болгох бол бусад компанийг ирэх 2023 оны дөрөвдүгээр улиралд багтаан нээлттэй үйл ажиллагаатай болгоно.

Мөн зарим улсын үйлдвэрийн газар, компаниудыг татан буулгах, нэгтгэн нийлүүлэх шийдвэрийг Засгийн газраас гаргалаа. Энэ удаад “Монгол Улс” ТӨААТҮ-ийн газрыг татан буулгахаар шийдвэрлэлээ. Усны газар байгуулагдсанаар чиг үүргийн давхардал үүссэн гэж үзэж ийнхүү татан буухаар боллоо. Мөн Хууль зүйн яамны харьяа ажилчдын хувцас үйлдвэрлэдэг “Цагаан шонхор” ТӨААТҮ-ийн газрыг Батлан хамгаалах яамны харьяа “Бөртэ” үйлдвэртэй нэгтгэхээр шийдвэрлэв" гэв. 

Т.Мөнхжаргал