Сурагчийн ширээнээс их сургуулийн босго давж байгаа шинэхэн оюутнууддаа зориулан улсын хэмжээний томоохон их сургуулиудын босго оноо болон элсэлтийн дэлгэрэнгүй мэдээллийг тодрууллаа. Энэ жилийн хувьд их сургуулийн элсэлтийн бүртгэл 100 хувь цахимаар үргэлжилж байгаа нь сургуулийн өмнө үүсдэг байсан урт дарааллыг халж, олон хүний ажлыг хөнгөвчилсөн шийдэл байсныг шинэ элсэгчид хэлж байлаа. Ингээд та бүхэнд дараах мэдээллийг бэлтгэхийн сацуу шинэ элсэгчдийн сэтгэгдлийг сонссоноо хүргэж байна.
Монгол Улсын Их Сургууль
МУИС-ийн элсэлт бүртгэлийн хэлтсийн дарга Б.Хишигням
-Энэ жил хэчнээн хөтөлбөрөөр элсэлт авч байгаа вэ? Элсэлтийн бүртгэлийн системд хэдэн шалгуулагч бүртгүүлсэн байна вэ?
-МУИС энэ жил багцаар, шууд хөтөлбөрөөр, хамтарсан хөтөлбөрөөр гээд 35 орчим хөтөлбөрөөр элсэлт авч байна. Багцаар гэдэг нь эхлээд ерөнхий эрдмийн хичээлүүд үзэж байгаад хоёрдугаар курсээсээ мэргэжлийн хөтөлбөрөө сонгохыг хэлж байгаа юм. Тухайлбал, Нийгмийн ухааны салбарын багцад ороод тухайн жилээ ерөнхий эрдмийн хичээл үзнэ. Жилийн дараа буюу хоёрдугаар курсд орохоос өмнө голч оноогоор жагсаад мэргэжлийн хөтөлбөрөө сонгоно. Нэг хэсэг нь шуут хөтөлбөрт бүртгүүлж байна. Үүнд байгалийн шинжлэх ухааны таван мэргэжил байгаа. Манай сургууль Эрдэнэт, Завханд салбар сургуультай. 1+3, 2+2 гэсэн хөтөлбөрүүд бий. Тиймээс хоёр жил Завханд, хоёр жил Улаанбаатарт суралцах боломжтой буюу хамтарсан хөтөлбөрт хамрагдаж байна гэсэн үг юм. Элсэлт зургаадугаар сарын 2-ноос зургаадугаар сарын 28-ны 12 цаг хүртэл явагдсан. Нийт 14 мянга орчим хүүхэд бүртгүүлсэн байна. Хяналтын тоо 3700 орчим бий.
-Цахимаар алдаа гарах тохиолдол их бий. Дийлэнх нь ямар алдаа гарч байна вэ?
-Хүүхдүүдийн гаргаж буй алдаа юу вэ гэхээр Боловсролын үнэлгээний төв дээр ЭЕШ өгөхдөө бүртгүүлсэн бүртгэлийн дугаараар сургуульдаа бүртгүүлдэг. Өөрөөр хэлбэл, бүртгэлийн дугаар, нууц үг ижилхэн буюу зөрөхгүй байх ёстой. Гэтэл хүүхдүүдийн бүртгэлийн дугаар, нууц үг зөрөөтэй байна. Одоогоор 300 гаруй хүүхдийн бүртгэлийн дугаар зөрчихсөн байна. Бид утсаар залгаж яриад, систем дээр түүнийг нь зөв болгож зассан.
-Онооны жагсаалтууд гарч дууссан уу?
Өчигдөр үдээс хойш тооцоолсон онооны жагсаалт гарч дууссан. Хүүхдүүд арван төрлийн хичээлээс шалгалт өгдөг шүү дээ. Тухайлбал, хэрэглээний багц-1 хөтөлбөрт орно гэвэл суурь шалгалт, дагалдах шалгалт нь ямар вэ гэдгээс нь хамаарч тооцоолсон оноог гаргадаг. Суурь шалгалтын оноог 0,7 дагалдах шалгалтын оноог 0,3-аар үржүүлээд, нэмсэн нийлбэр байдаг.
-Хувиараа баталгаажуулах хугацаа хэд хоног үргэлжлэх вэ?
-Элсэх эрх олгох үйл ажиллагаа зургаадугаар сарын 30-ны 10 цагаас эхлээд долдугаар сарын 8-ны өдөр хүртэл үргэлжлэнэ.
-Тухайн алдаанаасаа болоод хувиараа авч чадахгүй тохиолдол байдаг шүү дээ. Ийм тохиолдол гарч байна уу?
-Тийм ээ. Гарч байгаа. Үнэхээр хүссэн хувиараа авчихсан байх юм бол эрхээ баталгаажуулах хэрэгтэй. Тухайн хүүхэд баталгаажуулах хугацаандаа баталгаажуулж амжаагүй бол дараагийн хүүхдэд тэр хувиар шилжинэ. Өмнөх жилүүдээс харахад цагийг нь тулгаж хийдэг. Банк хооронд гүйлгээ хийхэд удаан гэдгийг бид мэднэ. Тухайн хүүхэд мөнгөө шилжүүлчихсэн гээд байдаг, гэтэл манай дансанд орж ирэхгүй байх тохиолдол олон бий. Үүнээс болоод хувиараа авч чадаагүй тохиолдол мэр сэр гардаг. Тиймээс хэдэн цагийн өмнө баталгажуулалтаа хийх хэрэгтэй.
Элсэлтийн процесс цахимаар явдаг. Ямар нэг хүний гар ажиллагаа ордоггүй. Тийм ч учраас энэ хүүхэд баталгаажуулсан юм байна, манайд орж ирээгүй ч мөнгөө хийсэн юм байна энэ хүүхдийг дээш нь доош нь оруулъя гэсэн зүйл огт байхгүй.
Шинэ элсэгч З.Баяржавхлан: Би Нийслэлийн 113-р сургуулийг төгссөн. МУИС-ийн Бизнесийн салбар сургуульд элсэн орохоор бүртгүүлсэн. МУИС цахимаар бүртэл нь явж байгаа. Энэ нь хаана байгаа газраасаа бүртгүүлэх давуу тал болж байна. Цаг хэмнэж байна. Би математик, нийгмийн ухааны хичээлээр ЭЕШ өгсөн. МУИС бол миний эхний сонголт. Харин дараагийн сонголт бол ШУТИС. Тийм ч учраас давхар ШУТИС-д бүртгүүлсэн. ЭЕШ-ийн оноо тийм ч сайн биш учир жагсаалтаа хүлээж байна.
Шинэ элсэгч А.Хишигбат: Би МУИС-ийн Хэрэглээний шинжлэх ухааны салбар сургуульд орохоор бүртгүүлсэн. Электроникийн инженер мэргэжлээр сурна. Математик, физикийн хичээлээр ЭЕШ өгсөн. Мөн электроник инженерийн ангид ШУТИС-д бүртгүүлсэн.
Шинжлэх Ухаан Технологийн Их Сургууль
ШУТИС-ийн Сургалтын хөтөлбөр, бүртгэлийн албаны дарга Д.Батдорж
Энэ жил нийт 9000 орчим элсэгчид ШУТИС-д бүртгүүлсэнээс 6000 орчим нь инжинер технологийн чиглэлд бүртгүүлсэн. Үүнээс ерөнхий байдлаар хяналтын тоонд багтсан 5000 орчим сурагчид шинээр элсэн суралцах боломжтой. Нийт 109 мэргэжлийн хөтөлбөрөөр элсэлт авч байгаагаас архитехтур, интерьер дизайн, график дизайн, хувцас дизайн, үйлдвэрлэлийн дизайн, хэвлэлийн график дизайн гэсэн зургаан хөтөлбөрт ур чадварын шалгалт авдаг. Өнөөдөр буюу зургаадугаар сарын 30-ны 18:00 цагт ур чадварын шалгалтын хариу гарч онооны жагсаалт бэлэн болно. Улмаар хуваарь сонголт долоодугаар сарын 1-4-ны өдрүүдэд үргэлжилнэ. Энэ жилийн элсэлтийн бүртгэл 100 хувь цахимаар үргэлжилсэн. Ингэснээр олон хүний хөдөлмөрийг хөнгөвчилж өгсөн. Өмнө нь сургуулийн гадна олон өдөр халуун наранд дугаарлаж зогсдог байсан бол одоо орон зайнаас үл хамааран гэр, зуслан, малчны хотноос ч гэсэн мэргэжлээ сонгох боломжтой. Харин цөөн хэдэн тохиолдолд интернет сүлжээ, гар утасны датаны асуудлаас үүдэж мэргэжлээ цаг тухайд нь сонгож чадахгүй байх зэрэг асуудал үүсэж байгаа.
Соёл, Урлагийн Их Сургууль
СУИС-ийн Сургалтын бодлого, зохицуулалтын газрын дарга М.Амартүвшин
- СУИС энэ хичээлийн жилд хэчнээн хөтөлбөрөөр элсэлтээ авч байна вэ?
- 2022-2023 оны хичээлийн жилд СУИС нийт 24 хөтөлбөрийн 60 орчим мэргэжлийн чиглэлд элсэлтээ авч байна. Эдгээр хөтөлбөрийн 18 нь ур чадварын шалгалтаар элсүүлж байгаа. Үүнээс гадна соёлын сургуулийн мэргэжлийн хөтөлбөрүүдэд Бүгд Найрамдах Япон Улстай хамтарсан сургалт хэрэгжиж эхэлсэн. Энэ нь Монголдоо сураад үргэлжлүүлээд Японд дадлага хийх, суралцах боломжтой. Төрийн өмчийн зургаан их сургуулиудтай хамтарсан хөтөлбөр ирэх жилээс хэрэгжиж эхэлнэ. Иймд хамтын ажиллагаатай сургууль, төсөл хөтөлбөрт хамрагдах боломж нээлттэй.
- Сургуулийн тэтгэлэгтэй хөтөлбөрийн талаар танилцуулаач. ЭЕШ-ын онооноос хамаарч тэтгэлэг авах боломжтой юу?
- Манай сургуулийн зүгээс олон тэтгэлэгт хөтөлбөрүүд зарладаг. Энэ жилийн хувьд эрэлт ихтэй, тэргүүлэх зэргийн мэргэжлийн хөтөлбөрүүддээ СУИС-ийн захиралын нэрэмжит тэтгэлэг зарласан. Үүнд, Соёлын сургуулийн хөтөлбөрүүд, Номын сан судлал, Маркетинг, Менежмент зэрэг хөтөлбөрүүд зарлагдсан. Мөн суралцах хугацаандаа Боловсролын зээлийн сангийн зээл болон хамтран ажилладаг байгууллагуудын тэтгэлэгт хөтөлдбөрт хамрагдах боломжтой.
- Энэ жилийн элсэлтийн ур чадварын шалгалт ямар зарчмаар явагдаж байна вэ?
- Боловсрол, шинжлэх ухааны яам энэ жилээс эхлэн ур чадварын шалгалтыг хоёрдох хичээлд тооцуулахаар журамласан. СУИС-ийн дийлэнх хөтөлбөрүүд ур чадварт суурилсан байдаг учраас долоодугаар сарын 1-ныг хүртэл ур чадварын шалгалт үргэлжилнэ. Мөн зарим хяналтын тоонд хүрээгүй ангиудад нэмэлт элсэлт авна.
- Элсэлтийн системд хэчнээн элсэгч бүртгүүлсэн бэ. Үүнээс хяналтын тоонд багтсан хэдэн оюутныг элсүүлэх вэ?
- Энэ хичээлийн жилд СУИС 660 орчим шинэ элсэгч элсүүлэх хяналтын тоог батласан. Өнөөдрийн байдлаар бүртгэлийн системд 4500 орчим элсэгч бүртгэлээ илгээсэн байна. Мөн элсэх хүсэлтэй хүүхдүүд маань сургуулийн вэб сайтаас хөтөлбөрүүдийн талаар дэлгэрэнгүй мэдээлэл авах боломжтой.
Шинэ элсэгч Э.Мөнхзолбоо: Би Сүхбаатар аймгаас ирсэн. Багаасаа урлагт дурлаж өссөн болохоор СУИС-д элсэхээр шийдсэн. Миний хувьд Хөгжмийн найруулагч, Багш урлагийн боловсрол, Орчин цагийн страдын дуулаачийн ангид элсэхээр ур чадварын шалгалт өгөөд гарч ирлээ. Хамт элсэж байгаа хүүхдүүдийг харахад сандрал ихтэй харагдсан. Сэтгэл зүйгээ маш сайн бэлдэх шаардлагатай юм байна. Миний бүртгүүлсэн ангиудын ур чадварын шалгалтад сонсгол, төгөлдөр хуурын ур чадварт суурилж шалгалтаа авсан.
Шинэ элсэгч Б.Төгөлдөр: Миний хувьд СУИС-ийн Орчин үеийн страдын дуулаачийн анги, Хөгжимдөх урлагийн ангид бүртгүүлсэн. Багаасаа дуу хөгжимд хайртай, дуулах дуртай байсан учраас энэ талын авьяасаа хөгжүүлэх гэж энэ ангийг сонгосон. Би өөрөө Дарханых. Манай гэр бүлийхэнд урлагийн талын хүн байхгүй, харин би байж болох юм гэж бодсон.
Шинэ элсэгч Г.Хонгорзул: Намайг Г.Хонгорзул гэдэг. Дорнод аймгаас Дуурийн дуулаачийн ангид элсэхээр ирсэн. Ур чадварын шалгалтын хувьд дуулах ур чадвар, сонсгол, ритм хэмнэл, хөгжимдөх ур чадвар гэсэн байдлаар өгсөн. Би шалгалтынхаа өмнө Ардын жүжигчин А.Долгор багшийн удирдлага дор бэлтгэлээ хийж, Өргөн хангайн нутаг болон Орос ардын дуу Утро туманное гэх хоёр дууг бэлдэж ирсэн.
Т.Мөнхжаргал, Д.Батчулуун
Сэтгэгдэл (1)