Өнөөдөр Эдийн засгийн бодлого, өрсөлдөх чадварын судалгааны төвөөс “Дэлхийн өрсөлдөх чадварын тайлан 2022”-ыг танилцууллаа. Дээрх судалгааны тайланд 63 улс өрсөлдсөнөөс Монгол улс 61 дүгээрт эрэмблэгдэж Аргентин, Венесуэл улсуудын өмнө оржээ. Дээрх улсуудын хувьд эдийн засаг болон засаглалын хувьд хямралтай, инфляцын түвшингээр Венесуэл улс 222 хувь, Аргентин 58 хувьд хүрчээ. 

Доктор П.Цагаан Монгол Улс "хашсан морь" шиг байна

"Дэлхийн 63 орныг эдийн засаг, засаглал, бизнесийн үр ашгийн дөрвөн багцийн 330 орчим үзүүлэлтээр дүгнэлээ.  Өнгөрсөн 12 жилийн судалгаанаас харвал Монгол Улс “хашсан морь” шиг байна. Энэ жилийн длхийн өрсөлдөх чадварыг Дани улс тэргүүлсэн. 20 жилийн өмнө өрсөлдөх чадвараараа 15 дугаарт эрэмблэгдэж байсан бол энэ жил тэргүүллээ.

Одоогоос 10 жилийн өмнө Монгол Улс эдийн засгийн чадвараараа 16, 17 дугаар байранд байсан бол 2013 оноос эхэлж энэ үзүүлэлт уруудаж 60-руу орсон. Энэ тайлан бол бодлого, үйл ажиллагааны үр дүнг хэмждэг.

Улс орныг хөгжүүлэхэд тогтвортой, аюулгүй, бизнесийн орчин хэрэгтэй. Харин Монгол улсын эдийн засгийн хувьд хамгийн сул байгаа таван үзүүлэлт нь эрх зүйн орчин, бодлогын тогтвортой байдал, эрдэм шинжилгээ, хөгжлийн судалгааны соёл, найдвартай дэд бүтэц орж байгаа бол хамгийн сул үзүүлэлт нь засаглалын чадавх байна" гэв.

Т.Мөнхжаргал