Өнөөдөр АН-ын бүлэг Үндсэн хуулийн нэмэлт өөрчлөлттэй холбоотой асуудлаар мэдээлэл хийлээ.

АН-ын Ерөнхий нарийн бичгийн дарга Ч.Өнөрбаяр: УИХ-ын гишүүд, эрх баригчид үнийн өсөлттэй тэмцэх ёстой байтал, үндсэн хуультайгаа тэмцэж байна. Монгол Улсын эдийн засаг, ард түмний амьдрал уруудаж байгаа нь үндсэн хуультай холбоотой мэт харагдуулж байна. Өмнө нь 2019 онд яг ийм үндэслэлээр үндсэн хуульд гар хүрсэн. Тухайн үед манлайлж өөрчлөлт хийсэн хүн нь УИХ-ын дарга Г.Занданшатар.  Тиймээс батлуулсан, тангараг өргөсөн үндсэн хуулиа одоо хамгаалах цаг нь болсон юм биш үү. МАН-ын хийсэн буруу бүхэн үндсэн хуулийн буруу болоод үлддэг байх таарахгүй. Энэ бол хэтэрхий хариуцлагагүй байгаа хэрэг. Хариуцлагыг үндсэн хуулиас биш өөрсдөөсөө нэх.

Монгол Улс халуун зунаар хариуцлагын зуданд ороод байна. Ардчилсан намын бүлгийн асуудал та нарт ямар хамаатай юм бэ. Өчигдөр Төрийн байгуулалтын байнгын хороогоор АН-ын бүлэгтэй холбоотой хууль батлахаар хэлэлцсэн. Ингэж байхаар төрийн албан тушаалтнуудад хариуцлага тооцдог хууль батал.

Ажлаа хийж чадахгүй байгаа сайд, дарга нарт хариуцлага тооцдог хуультай болох хэрэгтэй. УИХ Үндсэн хуулиа манаж чадахгүй, үнэнч биш байгаа, ардчилсан үндсэн хуулиасаа урваж байгаа УИХ-ын даргыг огцруулах ёстой. УИХ-ын дарга сонгогдохдоо Үндсэн хуульдаа үнэнч байна гэж тангараг өргөдөг. Үндсэн хуульдаа үнэнч байхгүй байгаа хүн ард түмэндээ үнэнч байх уу? Үндсэн хууль руу нулимж байгаа хүн эх орондоо үнэнч байх уу?" гэв. 

Т.Мөнхжаргал