"Аль-Каида" бүлэглэлийн толгойлогч Айман аль-Завахириг Афганистанд байхад нь сөнөөгч дроноор устгасан талаар АНУ-ын ерөнхийлөгч Жо Байден мэдэгдлээ.

Тэрээр өнгөрсөн ням гарагт Афганистаны нийслэл Кабул хотод Тагнуулын төв газраас явуулсан терроризмын эсрэг ажиллагааны үеэр амь үрэгджээ. Айман аль-Завахири нь Осама Бин Ладентай хамт 2001 оны есдүгээр сарын 11-ний халдлагыг зохион байгуулсан бөгөөд Америкийн "хамгийн их эрэн сурвалжлагдаж буй террористуудын" нэг байсан юм.

АНУ-ын Ерөнхийлөгч Жо Байден хэлэхдээ "Айман аль-Завахири бол Америкийн иргэдийн эсрэг аллага, хүчирхийллийн ул мөрийг сийлсэн нэгэн. Тэрээр нуугдаж байхдаа Аль-Каидагийн салбарууд болон дэлхийн өнцөг булан бүрт үйл ажиллагааны удирдамж өгөх тэргүүлэх чиглэлийг тогтоож, АНУ-руу халдлага үйлдэхэд уриалж, нөлөө үзүүлж байсан. Одоо шударга ёс тогтсон бөгөөд террорист удирдагч байхгүй болсон.

Түүнийг хөнөөсөн нь 2001 оны халдлагын үеэр амиа алдсан 3000 орчим хүний ​ар гэрийхэнд өгч буй хариу байлаа" хэмээв.

Айман аль-Завахири 2011 онд Бин Ладеныг нас барсны дараа Аль-Каидагийн эрх мэдлийг авч толгойлж иржээ. Албаны хүмүүсийн мэдээлснээр Айман аль-Завахириг хамгаалалтын байшингийн тагтан дээр байхад нь сөнөөгч дрон хоёр пуужин харвасан байна. Байшинд гэр бүлийн бусад гишүүд байсан ч гэмтэл аваагүй бөгөөд халдлагын үеэр зөвхөн Завахири амь үрэгдсэн тухай мэдэгдлээ.

Эх сурвалж: BBC