Энэ жилийн Үндэсний их баяр наадмаар Улсын цол хүртсэн бөхчүүдийг цувралаар хүргэж байна. Энэ удаа Сэлэнгэ аймгийн Цагааннуур сумын уугуул Улсын арслан Б.Орхонбаярыг онцолж байна.

Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110,111, Ардын хувьсгалын 100, 101 жилийн ой Үндэсний их баяр наадмын хүчит бөхийн барилдаанд Сэлэнгэ аймгийн Цагаануур сумын уугуул Баярсайханы Орхонбаяр ес давж, Улсын арслан цол хүртсэн билээ. Тэрбээр 1998 оны долоодугаар сарын 1-нд Сэлэнгэ аймгийн Цагааннуур суманд төрж өсжээ.

Тэрбээр сумын заан цолоо 2016 онд хүртэж байв. Үүний дараа 2018 онд аймгийн арслан цол хүртсэн бөгөөд Сэлэнгэ аймгийн баяр наадамд аймгийн харцага Н.Энхжаргалаар найм даван түрүүлсэн юм. Дараа жил нь буюу 2019 онд Сэлэнгэ аймгийн баяр наадамд аймгийн арслан Н.Баярбаатараар найм даван түрүүлж, аймгийн арслан цолоо баталж байв.

Төрийн наадамд 2019 онд 21 насандаа анх удаа барилдахдаа улсын начин цол хүртсэн билээ. Түүний амжилтыг өмнө нь дархан аварга Д.Дамдин, Х.Баянмөнх, Б.Бат-Эрдэнэ, улсын арслан Ө.Эрдэнэ-Очир, улсын гарьд Ж.Бат-Эрдэнэ тэргүүтэй наймхан бөх давтсан юм. Ийнхүү тухайн онд улсын начин болсон хамгийн залуу хүчтэн болсон.

Тэрбээр 2020 оны улсын наадамд барилдахдаа зургаагийн даваанд шинээр улсын харцага болсон Б.Бат-Оршиход өвдөг шороодсон. Улмаар Б.Бат-Оршихоос допинг илэрсэн тул 2021 онд түүнд улсын харцага цол нөхөж олгосон юм.

Б.Орхонбаяр нь "Таван Хан" дэвжээ, "Алдар" спорт хороо, "Атар трейд" ХХК-ийн харьяат бөх юм.

Тэрбээр энэ жилийн Үндэсний их баяр наадмаар дараах бөхчүүдийн давж Улсын арслан цол хүртжээ. 

• Нэгийн даваанд Тува улсын бөх Мижитдорж Сайын /Тува/
• Хоёрын даваанд Аймгийн начин Н.Базарсүрэн /Баянхонгор аймаг/
• Гурвын даваанд Аймгийн арслан М.Отгонням /Баянхонгор аймаг/
• Дөрөвийн даваанд Аймгийн арслан Д.Алтанцоож /Хэнтий аймаг/
• Тавын даваанд Аймгийн арслан Д.Бадамгарав /Ховд аймаг/
• Зургаагийн даваанд Аймгийн  арслан О.Цэцэнцэнгэл /Хэнтий аймаг/
• Долоогийн даваанд Улсын арслан Ц.Содномдорж /Хөвсгөл аймаг/
• Наймын даваанд Улсын харцага Б.Бат-Өлзий /Ховд аймаг/
• Есийн даваанд Даян аварга Н.Батсуурь /Увс аймаг/

Б.Батчулуун