Монгол Улсын Гадаад харилцааны сайд Б.Батцэцэг БНХАУ-ын Төрийн зөвлөлийн гишүүн, Гадаад хэргийн сайд эрхэмсэг ноён Ван И-тэй Монгол, Хятадын найрсаг харилцаа, хамтын ажиллагааг иж бүрэн стратегийн түншлэлийн түвшинд хоёр талын хүчин чармайлтаар цаашид идэвхжүүлэн хөгжүүлэх өргөн хүрээний асуудлаар хэлэлцээ хийж санал солилцлоо.

Энэ хүрээнд Монгол Улсын Гадаад харилцааны сайд Б.Батцэцэг мэдээлэл хийлээ. Тэрбээр "Манай хоёр улс цар тахлын хүнд үеийг хамтдаа даван туулж, найрсаг, харилцан ашигтай хамтын ажиллагааны бүхий л салбарт өргөжүүлэн хөгжүүлж байгаад баяртай байна. Хэлэлцээний үеэр цаашдын хамтын ажиллагаа, дээд түвшний харилцан айлчлалуудын давтамжийг хадгалах, эдийн засаг, бүтээн байгуулалтын томоохон төсөл хөтөлбөрүүдийн хэрэгжилтийг эрчимжүүлэх, Монгол Хятадын хилийн боомтуудын үйл ажиллагааг өргөжүүлэх зэрэг асуудлуудаар ярилцлаа.

Түүнчлэн хоёр улсын Гадаад харилцааны яамд хоорондын хамтын ажиллагааг идэвхжүүлж 2023-2024 онд хамтран хэрэгжүүлэх арга хэмжээний төлөвлөгөөнд гарын үсэг зурлаа.

Олон улсын харилцааны нөхцөл байдал тогтворгүй, цар тахал бүрэн арилаагүй энэ цаг үед иж бүрэн стратегийн түншлэлийн харилцаатай найрсаг хөршийн хувьд, харилцаа, хамтын ажиллагаагаа улам бэхжүүлж, илүү ойр дотно хамтран ажиллах нь зүйтэй гэдэгт талууд санал нэгдлээ. Бүхий л салбарт үйл ажиллагааны чиглэлээ гүнзгийрүүлэхийг талууд нотолсон. Хилийн боомтыг төмөр замаар холбож, шинэ гарцыг бий болгосноор уул уурхайн бүтээгдэхүүний экспортыг урт хугацаанд тогтвортой явуулах нөхцөл бүрдэж байна. Хөдөө аж ахуйн бүтээгдэхүүнийг экспортлох, буцалтгүй тусламж, хөнгөлөлттэй зээлийн хүрээнд хамтран хэрэгжүүлж буй бүтээн байгуулалтын төслүүдийн явцыг урагшлуулах, газрын тосны бүтээгдэхүүний хамтын ажиллагааг нэмэгдүүлэх зэрэг асуудлаар дэлгэрэнгүй санал солилцлоо. "Эрдэнэбүрэнгийн УЦС"-ийн бүтээн байгуулалтыг хоёр тал эрчимжүүлэхээр тохиролцов. Хоёр талын худалдааны эргэлтийг 10 тэрбум ам.долларт хүргэх зорилтыг 2021 онд хэрэгжүүлснийг тэмдэглэж, цаашид худалдааг нэмэгдүүлэх боломжтой гэж үзлээ.

Хилийн боомтуудын үйл ажиллагааг эрчимжүүлэх ажлын хүрээнд Гашуунсухайт, Ганцмод боомтыг төмөр замаар холбох асуудлыг эцэслэн тохиролцож БНХАУ-ын талд урт хугацаанд, нүүрс тогтвортой нийлүүлэх гэрээ байгуулахаар тохиролцлоо" гэв. 

Т.Мөнхжаргал