БНХАУ-ын Төрийн зөвлөлийн гишүүн, Гадаад хэргийн сайд Ван И-гийн Монгол Улсад хийсэн айлчлал өндөрлөлөө. Түүний айлчлалын хүрээнд олон асуудлыг хэлэлцэж, үр дүнд нь дараах шийдвэрүүд гарлаа.

• Гашуунсухайт-Ганцмод боомтыг төмөр замаар холбох асуудлыг эцэслэн тохиролцож, хятадын талд урт хугацаанд нүүрс тогтвортой нийлүүлэх гэрээ байгуулахаар болов.

Гашуунсухайт-Ганцмод боомтыг төмөр замаар холбосноор хоёр улсын хилийн төмөр замын бүтээн байгуулалтыг эхлүүлэх эрх зүйн үндэс бүрдэх юм. Мөн тус бүтээн байгуулалтад шаардлагатай хөрөнгө оруулалт татах асуудлыг талуудын төмөр замын суурь бүтэц эзэмшигч аж ахуйн нэгжүүд хариуцаж, ойрын хугацаанд эхлүүлэхээр төлөвлөжээ. Гашуунсухайт-Ганцмод төмөр замын боомт нээгдсэнээр Монгол Улсын нүүрсний экспорт жилд 15 сая тонноор нэмэгдэх урьдчилсан тооцоо бий.  

• Эрдэнэбүрэнгийн УЦС-ын төслийн бүтээн байгуулалтыг хоёр тал эрчимжүүлэхээр тохиролцов.

Жаран жилийн дараа ийнхүү баруун таван аймгийг дотоодоосоо найдвартай, хямд эрчим хүчээр хангах төслийг урагшлуулах томоохон шийдвэр гарав. Тухайлбал, Эрдэнэбүрэнгийн цахилгаан станцыг барьснаар байгаль орчинд сөрөг нөлөөгүй бөгөөд эдийн засгийн ач холбогдол, үндэсний аюулгүй байдал талаасаа чухал төсөл юм. Энэхүү төслийг хэрэгжүүлэхийн тулд Хятадын Засгийн газар 271 сая ам.долларын хөнгөлөлттэй өгч, авахаар  болов.

• Ханги-Мандал боомтыг төмөр замаар холбох асуудлаарх манай талын хүсэлтийг хятадын тал анхааралдаа авч, үргэлжлүүлэн ажиллахаар болов.

Ханги боомт нь газарзүйн байршлаараа Гашуунсухайт, Замын-Үүд боомтуудын тэг дунд нь байрладаг учраас стратегийн хувьд туйлын чухал ач холбогдолтой юм. Уг боомтыг төмөр замаар холбож, шинэ гарц нээснээр манай улсын импорт, экспортын бараа бүтээгдэхүүний нэвтрэх хүчин чадал нийт 20 сая тонноор, төмөр замаар тээвэрлэгдэж байгаа нийт тээврийн хэмжээ 65 хувиар тус тус нэмэгдэх томоохон алхам болно.

• Хүмүүнлэгийн салбарын хамтын ажиллагааны хүрээнд БНХАУ-д суралцаж буй оюутнуудыг үргэлжлүүлэн танхимаар хичээллүүлэхээр тохиролцож, иргэдийн харилцан зорчих хөдөлгөөнийг хялбаршуулж сэргээхээр ярилцав.

БНХАУ-ын их, дээд сургуулийн төгсөх ангид суралцаж буй болон танхимаар зайлшгүй суралцах шаардлагатай оюутнууд өөрийн суралцаж буй их, дээд сургуулиас “танхимаар зайлшгүй суралцах шаардлагатай” тухай тодорхойлолтыг авснаар танхимаар хичээллэх боломжтой талаар өнгөрсөн тавдугаар сард мэдээлж байв. Харин уг хэлэлцээрийн хүрээнд БНХАУ-д суралцаж буй оюутнууд танхимаар хичээллэх болов.

• Төрийн тэргүүн нар утсаар ярих үеэр тохиролцсон цөлжилт, шороон шуургатай тэмцэх, байгаль орчныг хамгаалах чиглэлийн хамтын ажиллагааг өргөжүүлэх, “Тэрбум мод” үндэсний хөтөлбөрийн хүрээнд төсөл хөтөлбөр хамтран хэрэгжүүлэхээр тохиролцов.

Монгол Улсын Ерөнхийлөгч У.Хүрэлсүхийн санаачилсан манай улсад 2030 он хүртэл хэрэгжүүлэх “Тэрбум мод” үндэсний хөтөлбөр нь Монгол Улсад нүүрлээд буй цөлжилт, цаг уурын өөрчлөлтийн асуудлыг шийдвэрлэх экологийн өндөр ач холбогдолтой мега төсөл юм.  Манай улсын талаас 1 тэрбум мод тарих санаачлалыг эхлүүлсэн бол  Хятадын талаас 70 тэрбум мод тарих санаачилгыг гаргав.

Д.Батчулуун