Допингийн эсрэг үндэсний төв энэ жилийн наадмаар хүчит бөхийн барилдаанд дөрөв давсан 64 бөхийн шинжилгээний сорьцыг БНСУ дахь ДДЭА-ийн итгэмжлэгдсэн лаборатори руу илгээсэн. Тэгвэл сорьцоос допинг илэрсэн эсэх талаар Үндэсний их баяр наадмын бөхийн салбар комиссын дарга П.Сайнзориг дараах тайлбарыг өглөө.

Тэрбээр "Энэ жилийн үндэсний их баяр наадмаар дөрөв давсан 64 бөх, мөн шөвгөрсөн 16 харваач нийт 80 хүнээс допингийн шинжилгээ авсан. Одоогоор 16 харваач болон 60 орчим бөхийн шинжилгээний хариу ирээд байна. 4-5 бөхийн шинжилгээний хариу хараахан ирээгүй байгаа. Үүнийг ирсэн даруйд нь олон нийтэд нээлттэй зарлана.Допинг илэрсэн эсэх одоогоор тодорхойгүй байна. Бид ч ирсэн нэрийг задлаж үзээгүй. Дутуу байгаа бөхчүүдийн шинжилгээний хариу ирэхээр нэрийг задлах хууль эрх зүйн зохицуулалттай" гэв.