Засгийн газрын 2018 оны тогтоолын дагуу Улаанбаатар-Дархан-Уул чиглэлийн замыг дөрвөн эгнээ бүхий зам болгон өргөтгөхөөр болсон. Ингээд тендер зарлан 2019 оны зургадугаар сарын 17-ны өдрөөс замын ажлыг эхлүүлсэн байдаг юм.

Хамгийн анх Дарханы хуучин замыг хуулахдаа ганцхан жилийн дотор дөрвөн эгнээ замтай болгоно хэмээж байсан ч эдүгээ энэ замаар зорчигчдын там болсон хэвээр байна. Энэ замыг барих ажлын гүйцэтгэгчийг уг нь 2019 оны гуравдугаар сард олон улсын тендер зарлан таван багц хэсгээр сонгон шалгаруулж байлаа. Ингээд БНХАУ-ын “Хэйлонжин Жиньей Рөүд энд Бридж”, “Гуйжоу Хайвэй Инженеринг групп”, “Чайна Стэйт Шинжиан инженеринг”, “Чайна Жео-Инженеринг корпораци” гэсэн дөрвөн компани Дарханы замыг сонгон шалгаруулалтаар барихаар болсон.

Гэсэн ч энэ зам ингэж удааширч байгааг олон улсын тендер шалгаруулалттай холбоотой хэмээн үзэж байгаа. Учир нь, сонгон шалгаруулалтын шаардлага хангаагүй компанийг эрх мэдлээ урвуулан ашиглан шалгаруулсан байх магадлалтай хэмээн тухайн үеийн Зам, тээврийн яамны удирдлагуудыг АТГ-аас шалгаад эхэлжээ.

Энэ үед Зам, тээврийн сайдаар одоогийн УИХ-ын гишүүн Б.Энх-Амгалан ажиллаж байсан бөгөөд тендерийг хариуцаж байсан Х.Оргил-Эрдэнэ нарыг мөн АТГ-аас шалгаад эхэлжээ.

Б.Энх-Амгалан гишүүний хувьд УИХ-ын гишүүний халдашгүй бүрэн эрхтэй. Тиймээс энэ мөрдөн шалгах ажиллагаатай холбогдуулан Улсын прокурор Б.Энх-Амгалан гишүүний бүрэн эрхийг түдгэлзүүлэх саналаа энэ намрын чуулганаар УИХ-ын даргад өргөн барихаар зэхэж байгаа юм байна.

О.Балдан-Очир