-ДҮРЭМ, ЖУРАМ ГАРГААД ДАГАХГҮЙ ИХ УДЛАА. БҮГДИЙГ НЬ ХУУЛЬЧИЛАХ ХЭРЭГТЭЙ-

Өнгөрсөн амралтын өдрүүдэд Ерөнхий сайд Л.Оюун-Эрдэнэ, Нийслэлийн Засаг дарга Д.Сумъяабазар нар Нийслэлийн үйл ажиллагаатай танилцлаа. Тухайлбал, нийслэлд хэрэгжиж буй гэр хорооллыг дахин төлөвлөж, орон сууцжуулах төслийн хэрэгжилт,  нийслэлийн хэмжээнд хэрэгжиж буй зарим тохижилт, бүтээн байгуулалтын ажлын явцтай танилцав. Энэ үеэр тэдний ярианы онцлох хэсгүүдийг хүргэж байна.

ЕРӨНХИЙ САЙД Л.ОЮУН-ЭРДЭНЭ:

• Орон сууцны хороолол ашиглалтад ороход сургууль, цэцэрлэг адилхан ашиглалтад орох байдлаар зохицуулах ёстой. Үүнд ядаад байх хэрэг алга. Хуульчилчихъя.
• Тамхи татаж байгаад хаясан хүнийг 50 сая төгрөгөөр торгочих. Яахавдээ, Мөнгөтэй нь болно шүү дээ.
• Улаанбаатар хотоос хөдөөд очиж байгаа иргэдээ "Шинэ үеийн илгээлтийн эзэд" гэж нэрлэнэ. Тэгээд ипотекийн зээлийн багц дэмжлэг өгнө. Хөдөөд шилжин очиж байгаа төрийн албан хаагчийн цалинг хоёр дахин нэмэгдүүлнэ. Мөн нэг удаагийн тэтгэмж өгнө. 2023 оны улсын төсвийн нэг онцлог энэ.
• Улаанбаатарт ирж байгаа хүмүүс татвартай болно. Ингэж бид бодитой зохицуулалт хийхгүй бол цаг хугацаа өнгөрөх тусам Улаанбаатар хотын асуудал улам хүнд болно. Хүн ам өснө, автомашины тоо нэмэгдэнэ, эдийн засаг өснө, ажлын байр нэмэгдэнэ. Ингээд бид нутаг дэвсгэрийнхээ 0.3 хувьд төвлөрсөөр байгаад нэг хот улс болно. Энэ үндэсний аюулгүй байдлын асуудал болж, алс хязгаар нутаг эзгүйднэ.

50 мянган төгрөгийн торгуультай байхаар хог хаялгүй яах вэ дээ. 50 сая болгох хэрэгтэй.

• Дүрэм, журам гаргаад дагахгүй их удлаа. Бүгдийг нь хуульчилах хэрэгтэй.
• Эрх чөлөө ярихын хажуугаар зоосны нөгөө тал болох үүрэг хариуцлагаа ухамсарлах хэргтэй.
• Сургууль цэцэрлэгийн стандартыг бариагүй бол тусгай эрхийг цуцал. Хууль эрх зүйн орчин хэрэгтэй бол УИХ-д оруулаад ир.
• Гэр хороолол хаус хороолол болж хөгжих бүрэн боломжтой. Энэ тохиолдолд хэсэгчилсэн дэд бүтцийг шийдвэрлэх шаардлага үүснэ. Тиймээс Сингапурын мэргэжилтнүүдээр хэсэгчилсэн дэд бүтцийн үнэлгээ хийлгэнэ. Мөн бусад дэд бүтэц, гэр хорооллын стандартыг сайжруулах дэд хөтөлбөрийг Сингапур Улстай хамтран хэрэгжүүлнэ.

НИЙСЛЭЛИЙН ЗАСАГ ДАРГА Д.СУМЪЯАБАЗАР:

• Цаашид тухайн газрын 40 хувь дээр нь барилга, 60 хувь дээр нь ногоон байгууламж бүхий цэцэрлэг сургуулиа барих хэргтэй. Дэлхийн стандартыг мөрдөх ёстой гэсэн хатуу байр суурьтай байна.

Усан паркын зориулалттай газрын эхний зориулалт орон сууцаар гарсан. Гэтэл үүнийг хүчингүй болгоод ахиж шүүхдээд дараа нь усан паркаар гаргасан. Ахиж шүүхдээд сэргэхээр нь орон сууц, усан парк, тусгай зориулалт гэсэн гурван чиглэлээр гарсан. Усан паркийн газарт барилга барих нь хууль зөрчөөгүй. Улстөржүүлээд л яваад байгаа юм.

• Улаанбаатар хотын төлөвлөлт алдагдсантай холбоотойгоор үүнийг засаж янзлах тал дээр зохион байгуулалт хийж ажиллаж байна. Амаргүй байна.
• Зохион байгуулалтыг маш сайн хийгээд түгжрэлийг бууруулахад зам засвар арчилгаа, хурдны зам, нийтийн тээврийн парк шинэчлэлт, сургууль цэцэрлэгийн хүртээмжийг нэмэгдүүлэх зэрэг ажлуудыг төлөвлөлтийн дагуу хийж байна.
• Гэр хорооллыг орон сууцжуулах ажилд Сингапур улсын туршлага, орон сууцны бодлогыг нутагшуулан хэрэгжүүлж, ипотекийн зээлийн зохицуулалт, хөрөнгийн эх үүсвэрийн зөв схемчлэл гаргаж ирэхээр зорьж буй юм.

Д.Батчулуун