Хууль зүйн яамны Төрийн нарийн бичгийн дарга П.Сайнзориг допингийн шинжилгээний талаар дараах мэдээллийг өглөө.

Тэрбээр "Өмнө нь тавын даваанаас дээш давсан бөхчүүдээс допингийн шинжилгээ авч байсан бол энэ жил дөрөв болон түүнээс дээш давсан бөх, сурын харваанд шалгасан харваачид буюу нийт 80 хүнээс допингийн шинжилгээ авсан. Үүний 16 нь харваач, 64 нь бөхчүүд байна. Допингийн шинжилгээг цагдаа, тагнуулын байгууллагын хяналт оролцоотойгоор допингийн эсрэг үндэсний хорооны ажилчид авч БНСУ-ын лабораторид илгээсэн. Эхнээсээ хариу нь ирж байгаа ч 80 хүний хариу бүрэн ирээгүй байгаа тул хариутай танилцаагүй байна.

Цахим орчинд бөхчүүд допинг хэрэглэсэн байж болзошгүй гэсэн ташаа мэдээллүүд явж байна.Одоогоор хэн нэгэн допинг хэрэглэсэн, хэрэглээгүй гэдгийг хэлэх болоогүй.

80 хүний 77-гийнх нь хариу ирсэн бол гурван бөхийн хариу ирээгүй байна. Хариу нь бүрэн ирэхээр зохих журмын дагуу олон  нийтэд мэдээллэнэ" гэв.

Т.Мөнхжаргал