Засгийн газрын ээлжит хуралдаанаас гарсан шийдвэрийг танилцууллаа. Энэ үеэр Боловсрол, шинжлэх ухааны сайд, Цахим хөгжил, харилцаа холбооны яамны үүрэг хариуцагч Л.Энх-Амгалан дараах мэдээллийг өглөө.

Тэрбээр "Монгол Улсын үндэсний цахим шуудангийн системийг өнөөдрөөс нэвтрүүлж эхэллээ. Энэ нь 16 наснаас дээш насны хүмүүст И-Монголиа системээр дамжуулж цахим хаягтай болгож байгаа юм. Монгол Улсад ухаалаг гар утас хэрэглэдэг 3.8 сая иргэн байгаагаас 1.5 сая нь И-Монголиа системийг ашиглаж байна.

Үндэсний цахим шуудангийн гол давуу тал нь иргэн-төртэй шууд харьцах, төр-иргэнтэй шууд харьцах харилцааг шинээр бий болгож байгаа юм.

Өнөөдрийн байдлаар гадаад паспортын хугацаа дууссан 61 мянган иргэн, иргэний үнэмлэхийн хугацаа дууссан 4950 иргэн байна. Энэ хүмүүст цахим хаягаар дамжуулж хугацаа дууссаныг сануулах, мэдэгдэл хүргүүлэх юм. Заавал дарга, яам тамгын газрын үүд сахиж суух биш өөрийн хэрэгцээтэй санал хүсэлт, мэдээллээ цахим шуудангаар илгээх боломжтой тогтолцоонд шилжиж байна.

И-Монголиа системээр дамжуулж иргэд төрийн 680 орчим үйлчилгээ авах боломжтой. Сүүлд цэцэрлэгийн бүртгэлийг И-Монголиа системээр дамжуулж авсан. Одоо сургуулийн бүртгэл мөн тус системээр цахимаар хийнэ. Цаашдаа иргэнд татварын ямар нэг харилцаа үүссэн, аж ахуй нэгжийн лицензийн хугацаа дууссан үед мэдэгдэл хүргүүлнэ.

Нийтийн ил тод байдлын тухай хуулийн дагуу хувь иргэний мэдээллийг өөрт нь мэдэгдэхгүйгээр ашиглахыг хориглосон. Хэрэв хууль хяналтын байгууллага, төрийн байгууллага хувь хүний нууцтай холбоотой иргэний мэдээллийг ашигласан бол ямар байгууллага, ямар зорилгоор ашигласан нь мэдэгддэг байх юм" хэмээв.

Т.Мөнхжаргал