Өнгөрсөн амралтын өдрүүдэд /2022.08.13-14/ Булган аймгийн Сайхан сумын нутаг дахь Өрмийн цагаан нуурын эрэгт “Айраг наадам” зохион байгуулагдсан. Энэ үеэр дөрвөн хүүхэд машинд мөргүүлсэн хэрэг гарсан бөгөөд энэ талаар Булган аймгийн засаг даргын орлогч Д.Жаргалсайханаас тодруулахад дараах мэдээллийг өглөө.

Тэрбээр “Машинд мөргүүлсэн хүүхдүүдийн бие тэнхэрсэн гайгүй сайн байна. Хугарал байхгүй, шокийн байдалтай байна. Хүүхдүүдийн хувьд 16-17 насны гурван айлын дөрвөн хүүхэд бий. Тэдний хоёр нь бол зүв зүгээр, эмнэлэгт хэвтэлгүй явсан.

Угаасаа хоёрыг нь авч ирээгүй юм. Нэг хүүхдийн гарын савхан яс хугарсан, бусад хүүхдүүдийн хөл, гар хугарсан зүйл байхгүй. Мөргөсөн жолоочийн хувьд сайн мэдэхгүй байна. Сүүлд жолоочийг нь барьж цагдаа нарт хүлээлгэж өгсөн. Булган аймгийн Баян-Агт сумын хүн юм шиг байсан” гэв.

Харин Цагдаагийн ерөнхий газраас тодруулахад, жолоочийн хувьд согтууруулах ундаа хэрэглэсэн байсан нь тогтоогдсон, шалгалтын ажил явагдаж байгаа тул мэдээлэл өгөх боломжгүй гэв.

Т.Мөнхжаргал