Улсын нэгдүгээр төв эмнэлэг 30 ажилтандаа байрны урьдчилгаа өгсөн байна. Эх хүүхдийн эрүүл мэндийн төв 33 ажилтанд байрны урьдчилгаа 30 сая төгрөгийг тус бүрд нь гардуулчихлаа. Гэмтэл согог сэргээн засах төв эмнэлэг 35 ажилтанд 30 сая төгрөгийн орон сууцны дэмжлэг үзүүлж эрхийн бичиг гардуулжээ. Дорнод аймгийн Бүсийн оношлогоо эмчилгээний төв хоёр сувилагчид 20 сая төгрөгийн орон сууцны дэмжлэг өгчээ. Энэ бол өнөөдөр олон нийтэд мэдээлэгдсэн тоо. Үүнээс цаашаа энэ мэдээ хөврөх юм гэнэ. Өөрөөр хэлбэл, хэн нь олон байрны урьдчилгаа өгөх вэ? гэсэн марафон Эрүүл мэндийн салбарт эхэлчихжээ.

Учир нь Эрүүл мэндийн сайд С.Энхболд 2022 оны наймдугаар сарыг Эрүүл мэндийн салбарын ажилчдын нийгмийн хамгааллыг сайжруулах сар болгон салбарынхаа хэмжээнд зарлаж, энэ хүрээнд зохих арга хэмжээ авч ажиллахыг Эрүүл мэндийн байгууллагын удирдлагуудад үүрэг болгосон байна.

2022 оны гуравдугаар сард Эрүүл мэндийн сайд С.Энхболд Засгийн газраар 107 дугаар тогтоол гаргаж салбарынхаа ажилчдын цалингийн доод хэмжээг тогтоож өгсөн. Мөн гүйцэтгэлийн санхүүжилтийн хүрээнд үндсэн цалинг нэмэгдүүлэх арга хэмжээ авахыг эмнэлгийн удирдлагуудад үүрэг өгчээ. Тухайн үед эмнэлэг тус бүр үндсэн цалинг нэмэх арга хэмжээг авч байсан байна. Харин 2022 оны наймдугаар сард дахин энэ үүрэг чиглэлийг өгсөн. Уг үүрэг чиглэлийн хүрээнд лавлагаа шатлал болон аймаг, дүүргийн эмнэлгүүд үндсэн цалингаа багадаа 10 хувь, дээд тал нь 40 хувь нэмэгдүүлээд байна. 

Тухайлбал Улсын Гуравдугаар төв эмнэлэг гэхэд Эрүүл мэндийн сайдын тушаалаар 2021 оны 7 дугаар сард 20 хувь, Засгийн газрын 107 дугаар тогтоолын хүрээнд 2022 оны 3 дугаар сарын 1 өдөр 8 хувь нэмээд байсан бол гүйцэтгэлийн санхүүжилтийн өгөөжөөр 2022 оны наймдугаар сарын 1 өдөр 40 хувь  нэмж дундаж цалингаа 1200000 төгрөг хүргэсэн байна.