Засгийн газрын өчигдрийн хуралдаанаар Эрдэнэбүрэнгийн усан цахилгаан станцын төслийн ажлыг удаашруулсан Ховд аймгийн Засаг дарга Б.Дүгэржавыг ажлаас нь чөлөөлсөн.

Б.Дүгэржавыг хангалтгүй ажилласан гэх үндэслэлээр албан тушаалаас нь чөлөөлсөн. Тухайлбал, түүнийг Эрдэнэбүрэнгийн усан цахилгаан станцын төслийн ажлыг удаашруулсан гэж үзэн дээрх шийдвэрийг гаргасан байна.

• Ерөнхий сайд Л.Оюун-Эрдэнийн Эрдэнэбүрэнгийн усан цахилгаан станцыг барих газрын чөлөөлөлтийг хийх,
• Усан цахилгаан станцыг барих ажлыг урагшуулах чиглэлд анхаарч орон нутаг дахь зохион байгуулалт, менежментийн ажлыг үүрэг даалгаврыг биелүүлээгүй.
• Төслийн усан сан бүрэлдэх талбайн нөлөөлөлд өртөж буй 270 өрхийг одоо мөрдөгдөж буй Газрын тухай хууль, дагалдаж гарсан журмын хүрээнд 2022-2025 онд үе шаттайгаар нүүлгэн шилжүүлэх юм. Үүний хүрээнд 2022 онд нийт 91 өрхийг нүүлгэн шилжүүлэх санхүүжилтийг Улсын төсөвт тусгуулаад байгаа юм. Гэтэл зарим иргэд уг ажлыг эсэргүүцэж газар чөлөөлөх ажилд саад учруулсан зэрэг нь түүнийг огцруулах шалтгаан болов. 

Ховд аймгийн Засаг дарга Б.Дүгэржав нь:

1991 онд Ховд Мянгад сумын ерөнхий боловсролын сургуулийг төгсжээ. 1997 онд МУИС-ийн Ховд дахь салбар сургуульд суралцсан байна. Мөн 2013 онд ИЗОУИС-д элсэн 2016 онд төгсжээ.

Түүний ажлын туршлагаас дурдвал: 

1997 - Ховд аймгийн Мянгад сумын ерөнхий боловсролын сургуульд багш

1998 - Ховд аймгийн Мянгад сумын ерөнхий боловсролын сургуулийн сургалтын менежер

2000 - Ховд аймгийн Мянгад сумын ерөнхий боловсролын сургуулийн захирал

2008 - Ховд аймгийн Боловсрол, соёл урлагийн газрын дэд дарга

2009 - Ховд аймгийн Боловсрол, соёл урлагийн газрын дарга

2018 оноос Ховд аймгийн засаг даргаар ажиллаж байв. Ийнхүү Ховд аймгийн засаг даргаар гурван жил гаруй  ажиллаад, албан тушаалаасаа чөлөөлөгдөв.

Д.Батчулуун