Уг нь ч нэг их холын хэрэг биш, дөрвөн жилийн өмнөх л явдал. Улстөрчид, нөлөө бүхий албан тушаалтнууд оролцсон Жижиг дунд, үйлдвэрлэлийг дэмжих санг хуйгаараа цөлмөсөн хэрэг нийгэмд дуулиан дэгдээж байлаа. Сонгуулийн жилийн өмнөхөн дэгдсэн энэ хэрэгт эрх баригч МАН-ынхан илүүтэйгээр холбогдож байсан бөгөөд сонгуулийн үр дүнд нөлөөлнө гэж бодсондоо л нэг хэсэгт нь эрүүгийн, нөгөө хэсэгт нь улс төрийн хариуцлага тооцож байв. Харин нэлээд хэсэг ЖДҮ-чид нь ямар нэгэн хариуцлагагүй, тэр ч бүү хэл нэр нь ч хэвлэлүүдээр ил бололгүй үлдсэн.

Тэр хэсэг нь өнөөдөр мандан бадарч, төрийн өндөр албан тушаал хашиж буй  бөгөөд нэг нь УБТЗ-ын дарга Х.Хэрлэн юм. Энэ албан тушаалд томилогдохоосоо өмнө Ашигт малтмал, газрын тосны газрын даргаар ажиллаж байсан тэрээр төрөөс төрсөн тэрбумтны нэг тод жишээ.Хамгийн сүүлд АТГ-т гаргаж өгсөн Хөрөнгө орлогын мэдүүлэгтээ өөрөө жилд 1.4 тэрбум, гэр бүл нь 25 сая төгрөг олсон хэмээн мэдүүлсэн байдаг.

Нийтийн байр 2, оффис 1, зогсоол 1, эдгээр нь нийт 2.6 тэрбум төгрөгийн үнэлгээтэй хэмээн ХОМ-тээ дурдаж байсан Х.Хэрлэн 430 сая төгрөгийн үнэ бүхий хоёр ширхэг автмашинтай, 425 сая төгрөгийн үнэ бүхий үнэт эдлэлтэй. 1.2 тэрбум төгрөгийн хадгаламжтай, “Герман цонх” ХХК-д хувь эзэмшдэг. Тэгвэл ийм хөрөнгөтэй хэмээн мэдүүлж байсан тэрбумтан дарга 2018 онд задарсан ЖДҮ-гийн хэрэгт “тоос”-оо өргөсөн нэгэн. Гэсэн ч энэ дуулианд нэр нь илчлэгдэлгүй үлдэж, улмаар албан тушаал ахин буй.

Уг нь УБТЗ-ын дарга Х.Хэрлэн ЖДҮ-гийн хэрэгт холбогддог нь ЖДҮХС-гийн захирал асан С.Төгсбилэгийн мэдүүлгээр батлагддаг юм. С.Төгсбилэг мэдүүлэгтээ, “Цаасан дээр бичсэн Хэрлэн гэгч нь АМГТХЭГ-ын дарга Х.Хэрлэн юм. Б.Батзориг сайд надад анх Х.Хэрлэн даргын нэрийг хэлээд , “Түүнтэй холбогдож хуулийн этгээдийн нэрийг аваарай” гэж хэлж байсан.

Тэгээд би Хэрлэн даргатай утсаар холбогдоход тэрээр надад ”Их Монгол барилга” ХХК-ийн нэгийг хэлсэн учир би цаасан дээр Х.Хэрлэн даргын нэрийн араас “Их Монгол барилга” ХХК гэж тэмдэглэж байсан. Би төсөл сонгон шалгаруулалт явагдаж байх үеэр Х.Хэрлэн даргатай санамсаргүй байдлаар “Моннис”-ын барилга дотор тааралдаж байсан. Тэгж тааралдахад Х.Хэрлэн дарга надад “Би чамтай “Их Монгол барилга” ХХК-ийн хүмүүсийг уулзуулна” гэж байсан. Түүнээс хойш дахиж уулзалдаагүй бөгөөд надтай “Их Монгол барилга” ХХК-ийн захирал гэх эрэгтэй хүн (нэрийг нь санахгүй байна гэх) миний 88880... дугаарын утсаар холбогдож байсан. Ийнхүү “Их Монгол барилга” ХХК-ийн төсөл Б.Батзориг сайдаас санхүүжилтэд багтаах чиглэлтэй байсан учир тушаалд хамрагдаж, санхүүжилт авсан” гэсэн байдаг юм.

Жич: “Их Монгол барилга” ХХК нь 2018 оны есдүгээр сарын 12-нд ЖДҮХС-гаас 500.000.000 төгрөгийн хөнгөлөлттэй зээл авч байсан бөгөөд энэ үед Х.Хэрлэн АМГТГ-ын даргаар ажиллаж байв. “Их Монгол барилга” ХХК нь мөн Хөгжлийн банкны томоохон зээлдэгчийн нэгээр нэрлэгддэг. Энэ компани нь “Хэрэм зам” ХХК-тай түншлэн Хөгжлийн банкнаас 13 тэрбум төгрөгийн зээлийг мөн авч байсан баримт бий.

О.Балдан-Очир