Дунд гол дагуу Азид хамгийн том усан парк барина хэмээн сурталчилж байсан газар өдгөө 24 давхар орон сууцууд болж хувирсан. Улсын хяналтын байгууллагууд шалгаад акт үйлдээд ч уг барилга зогсоогүйгээр үл барам улам дээшээ сүндэрлэж буй. Ингэж акт үйлдсэн ч хааж чадахгүй байгаа Дунд голын урсац дагуу барьж байгуулж байгаа энэ орон сууцны барилгыг иргэд “Авлига хороолол” хэмээн нэрийдэх болсон. Сүүлийн өдрүүдэд “Эм энд Жи” констракшн энэ барилгынхаа талаар эерэг мэдээллүүд бэлтгэн цацах нь идэвхжсэн. Тэгвэл энэ нь усан паркаар эхлээд “Авлига хороолол” хочийг зүүсэн орон сууцны хороолол захиалга авч эхэлсэнтэй холбоотой байжээ.

Энэхүү барилга нь Хан-Уул дүүргийн 15 дугаар хорооны нутаг дэвсгэрт баригдаж байгаа бөгөөд 24 давхар бүхий долоон блоктой. Борлуулалтын албатай холбогдоход, “Эхний ээлжийн  2024 оны гуравдугаар улиралд ашиглалтад орох дөрвөн блок байрандаа захиалга авч байгаа. Үнийн хувьд метр квадрат нь 3 сая 900 мянган төгрөгөөс эхэлж давхар бүртээ 50 мянган төгрөгөөр үнэ нь нэмэгдэж байгаа аж.

Жишээлбэл, хоёр давхрын айл нэг мкв нь 3.900 мянган төгрөг бол гурван давхрын айлын нэг мкв нь 3.950 мянга, 12 давхарт 4.250 бол 20 давхарт 4.500 сая төгрөгийн өртөгтэй байна. Өрөөний хувьд 2-5 өрөөний сонголттой бөгөөд “одоогийн байдлаар хамгийн их эрэлттэй байдаг урагшаа баруун болон урагшаа зүүн харсан цонхтой байрууд түрүүлж зарагдсан бөгөөд давхрын сонголт цөөрсөн” хэмээв.

Т.Мөнхжаргал