Уул уурхайн салбарын үүсч, хөгжсөний 100 жилийн ойд зориулсан “Уул уурхайн долоо хоног 2022” арга хэмжээ болж байна. Энэ үеэр Засгийн газрын Хэрэг эрхлэх газрын дарга Д.Амарбаясгалан мэдээлэл өглөө.

Тэрбээр "Монгол Улс уул уурхайн салбарыг нэн даруй өндөр түвшинд хөгжүүлж байж эдийн засгийг солонгоруулах, бусад салбарын үр нөлөөг сайжруулахад голлох нөлөөтэй оролцоно. Тиймээс энэ салбарын хөгжлийг онцгой анхаарах ёстой гэж Засгийн газрын зүгээс үзэж байна.

Энэ хүрээнд хоёр зүйл дээр онцгойлон анхаарал хандуулна.

Нэгдүгээрт, гадаад дотоодын хөрөнгө оруулагчдын тогтвортой хөрөнгө оруулалт хийх хууль эрхзүйн орчин нөхцөлийг бүрдүүлэх ёстой. Монголын уул уурхайн салбарынхан Засгийн газрын болон ард иргэдийн тавьж буй шаардлагад анхаарал хандуулах хэрэгтэй. Салбар нь өөрөө бүрэн дүүрэн байж чадаагүйн улмаас доголдол үүссэн. Нэг ёсондоо, олборлолтоо хийдэг, нөхөн сэргээлтэд хөрөнгө мөнгөө зарцууладагггүй. Нөгөө талаар, уул уурхайн салбараас олж буй орлогын тодорхой хувийг иргэдэд олгодог байх тал дээр Засгийн газар анхаарч ажиллана.

Хоёрдугаарт, Уул уурхайн бүтээгдэхүүний боловсруулалт хийж, экспортлох боломжийг бүрдүүлнэ. Боомтын сэргэлтийн хүрээнд экспортыг нэмэгдүүлэх, хууль эрх зүйн орчныг тодорхой болгох хэрэгтэй юм.

Монгол Улсад дэлхийн түвшний шаардлагыг хангах хэмжээний ардчилсан соёл, бизнесийн орчинг өндөр ёс суртахуунтайгаар төлөвшиж чадаагүй байгаа. Тиймээс олон улсын хөрөнгө оруулагчдын хөрөнгө оруулалт баталгаатай бус болсон хэд хэдэн зүйлс бий. 

Бид ардчилсан шинэчлэлийг хийгээд 30 жил болж байгаа. Гаднын ижил ардчилсан орнууд, том хөрөнгө оруулагчид биднийг 100 жил болчихсон мэтээр хүлээн авч, тэр зэрэгтээ өндөр харилцаа үүсгэх гэж явсан нь алдаа дутагдалтай байсан.

Тиймээс энэхүү алдааг богино хугацаанд алдааг засах буюу Монгол Улсад хэрэгжиж буй хууль эрх зүйн орчныг олон улсын жишигт нийцсэн, бүрэн баталгаатай хууль эрх зүйн орчин болгож өөрчлөх хэрэгтэй. Өнөөдрийн арчилсан нийгмийн зохицуулж буй хууль эрх зүйн орчин бол энэ цаг үеийн харилцааг бүрэн зохицуулж чадахгүй байна. Тиймээс үүнд өөрчлөлт хийнэ” гэв.

Д.Батчулуун