Сүүлийн үед хамгийн халуун сэдэв Эрдэнэбүрэнгийн УЦС болоод байна. Энэ бүтээн байгуулалтыг удаашруулсанаас болж Ховдын Засаг дарга огцорсон, мөн хөрш Увс аймгийн Өмнөговь суманд нутгийн иргэд эсэргүүцлээ илэрхийлээд нэлээд хугацаа өнгөрч байна. Гол нь малчдын хаваржаа, намаржааны газар Усан цахилгаан станцаас болж усанд автах эрсдэлтэй байгаа юм.

Эрт үеэс нутаглаж ирсэн малчдын эсэргүүцлийг ойлгож болох ч, дайран дээр давс нэмдэг, Монголын бүхий л томоохон төслийг гацаахад оройлон оролцдог сэтгүүлч тэргүүтэй хүмүүс ч нутгийн иргэдийн эсэргүүцлийг турхирч хуурамчаар зураг эвлүүлж цацсан баригдаж амралтын өдрийн сошиалын гол сэдэв болж шуугилаа.

Монгол улсын Засгийн газраас Эгийн болон Эрдэнэбүрэнгийн УЦС-ыг барьж эрчим хүчний хараат бус болох зорилго тавьж буй энэ үед Эрчим хүчний сайдаар УИХ-ын гишүүн Б.Чойжилсүрэн тавигдсан нь учиртай. Ордоны тамхины цэгийн мэдээллээр Б.Чойжилсүрэн гишүүн ямар ч хамаагүй аргаар Эрдэнэбүрэнгийн УЦС-ын ажлыг явуулна гэдэг амлалт өгч сайдын суудалд очсон сурагтай. Ингэж амлах ч үндэслэлтэй.

Одоогийн Өмнөговь сумын удирдлагууд нь Б.Чойжилсүрэн гишүүний хүмүүс. Өнгөрөгч сонгуулиар тус сумын хурлын сонгуульд Б.Чойжилсүрэн сайд 17 бие даагчийг санхүүжүүлж сойсноос тав нь ялалт байгуулж, одоо Ардчилсан намтай хамтарч Засаг барьж байгаа. Эдгээр хүмүүсээрээ дамжуулан Эрдэнэбүрэнгийн УЦС-ыг эсэргүүцэгчдийг сайдаар томилогдмогцоо өөрийнх нь хэлж байсанчлан "аргалах" хүн нь Б.Чойжилсүрэн гишүүн ч байж мэдэх юм. Тэгээд ч Монголын барилгын салбарт магнат гэж нэрлэж болох Б.Чойжилсүрэн сайд энэхүү бүтээн байгуулалтад оролцохгүй гэвэл үнэнээс хол зөрөх биз ээ.

О.Балдан-Очир