Уул уурхайн салбарын үүсч, хөгжсөний 100 жилийн ойд зориулсан “Уул уурхайн долоо хоног 2022” арга хэмжээ болж байна. Энэ үеэр УИХ-ын гишүүн Х.Булгантуяа мэдээлэл өглөө.

Тэрбээр "Уул уурхайн салбартай холбоотой Шинэ сэргэлтийн бодлогын хүрээнд хэд хэдэн хуулийг өргөн барина. Баялгийн сангийн тухай хуулийг Засгийн газраас өргөн барьсан. Тухайлбал, уул уурхайн баялаг иргэн бүрд очихгүй байна гэдэгт төрийн зохицуулалт хийж байна. Мөн дараагийн том ажил бол ашигт малтмалын хууль, ашигт малтмалын ил тод байдлын тухай хуулиудад өөрчлөлт оруулна. Намар өргөн барина гэсэн хүлээлттэй байна.

Уул уурхайн салбарт сүүлийн арван жил уналтад орчихсон. Хууль эрх зүйн орчныг бүрдүүлэх зэргийг ярьж байна. Уул уурхайн салбарын өрсөлдөх чадварыг бууруулж буй дэд бүтэж, төмөр замын асуудлыг шийдэхгүй бол Монголын уул уурхай дэлхийд өрсөлдөхөд хэцүү байна.

Уул уурхайн салбар бол жижиг хөрөнгө оруулалт биш, урт хугацаанд явж байж, ашиг нь ордог. Энэ том салбарт янз янзын бодлого барьдаг. Сайд бүр гарч ирээд явах ч юм шиг, явахгүй ч юм шиг нэг төсөл хэрэгжүүлдэг. Тиймээс энэ салбарт итгэл үнэмшил төрж өгөхгүй байна. Уул уурхайн салбарыг дэмжихээс илүүтэй эсэргүүцэх нийгмийн чиг хандлага бий болсон. Үүнд улстөрчид нөлөөтэй гэж бодож байна. Төр бизнес, иргэд хоёрыг турхирдаг. Уг нь ойлголцуулах үүрэгтэй шүү дээ. Ж.Ганбаатар сайд уул уурхайн салбарыг унагаж буй гурван хүчин зүйлийг хэллээ.

1. Лиценз олголт буурсан
2. Гадаадын хөрөнгө оруулалт буурсан
3. Нийгмийн эсэргүүцэл нэмэгдсэн. Энэ гурваас үйдээд Монгол улсын 1 хувь ч хүрэхгүй газар нутаг дээр ашигт малтмалын олборлолт явагдаж байна" гэв.

Д.Батчулуун