АН-аас цаг үеийн мэдээлэл хийлээ. Энэ үеэр Ардчилсан залуучуудын холбооны тэргүүн Н.Болдбаатар сэтгүүлчдэд мэдээлэл өглөө.

Тэрбээр "Миний бие Ардчилсан залуучуудын холбооны есдүгээр чуулганаар нэр дэвшиж олонхын санал авч хүнд хэцүү, хариуцлагатай мөчид Ардчиллын залуучуудын холбоог тэргүүлэхээр болсон.

Ардчилсан намын хийсэн бүхнийг эрх баригч коммунист нам муулдаг. Ардчилсан тогтолцоо гарснаас хойш 32 жил өнгөрсөн, үүнээс 22 жилд нь энэ коммунист нам нийгмийг удирдсан. Үүний дөрөвхөн жилд нь АН засаглаж, зургаан жилд нь хамтарсан засаг хийсэн байна.

Нийгэмд маш олон асуудал байна. Өнөө цагт үг, үзэл бодлоо илэрхийлсэн хүмүүсийг ямар нэг байдлаар гутаан доромжлох, шүүх цагдаагаар айлгах, эрүүл хүнийг өвчтэй болгож СЭМҮТ-д аваачдаг ийм нийгэмд болсон. Дэлхийн өнцөг булан бүрт АН-ыг дэмждэг, үзэл бодлоо илэрхийлж байгаа залуус олон бий. Энэ залуус одоо нэгдэн нийлэх цаг нь болсон.

Бид өөрсдийгөө харлуулж, гутаан доромжилж олон жил болжээ. Гэтэл энэ хооронд дарангуйллын нийгэм бий болжээ. Тиймээс бид энэ нийгмийг бид өөрчлөх ёстой. Эрх барьж байгаа намын залуучуудын холбоо буюу НАМЗХ-д өнгөтэй мөнгөтэй хүмүүсийн хүүхдүүд , дарга нарын хүүхэд дарга, сайд нарын хүүхэд сайд, гишүүний хүүхэд гишүүн болдог. Гэтэл жирийн иргэдийн боловсролтой, мэргэжилтэй хүмүүс гудамжинд байна. Ерөнхий сайд бидэнтэй үе нэг залуу хүн. Харин тэр ах нарынхаа заавраар үйл ажиллагаа явуулж байна. Үнэт зүйл дээр нэгдсэн нэгдэл илүү хүчтэй байдаг гэдгийг удахгүй та бүгдэд харуулах болно. Ардчилсан залуучуудын холбоо хэн нэгний өмч биш, тэр дундаа АН бол хэн нэгний өмч биш. АН үнэт зүйл, үзэл баримтлалдаа нэгддэг ардчиллыг бий болгосон юм” гэв.

М.Сүхэхэй