“Өмнөд монголчуудын соёлын холбоо”, “Монгол хүн монгол хүндээ тусалъя” ТББ-ын тэргүүн Ч.Мөнхбаярыг гадаад улсын тагнуулын албатай хамтран ажиллахаар тохиролцсон, хамтран ажилласан гэх үндэслэлээр ТЕГ-ынхан баривчилж, гэрт нь нэгжлэг хийсэн.

Улмаар нийслэлийн Эрүүгийн хэргийн давж заалдах шатны шүүх 2022 оны есдүгээр сарын 20, 21-ний өдрүүдэд хуралдаж Ч.Мөнхбаярт холбогдох хэргийг хянан хэлэлцэж, анхан шатны шүүхийн шийтгэх тогтоолыг хэвээр үлдээн түүний өмгөөлөгч Г.Баасан, А.Батдорж нарын гаргасан давж заалдах гомдлуудыг хэрэгсэхгүй болголоо. 

Гэтэл хоёр ч шатны шүүхээс гэм буруутай нь тогтоогдсон Ч.Мөнхбаярын өмгөөлөгч Г.Баасан, А.Батдорж нар байсхийгээд л мэдээлэл хийж "Манай үйлчлүүлэгчийг хэлмэгдүүлж байна. Тэр хүн хоригдоод долоон сар гаруй хугацаа өнгөрлөө. Гадаадын тагнуулаас их хэмжээний мөнгө авсан гэж ор үндэслэлгүй гүтгэсэн. Гэмт хэргийг бүрэн шалгаж тогтоогүй. Тодруулаагүй зүйл олон бий. Мөрдөн шалгах ажиллагааг дутуу хийсэн.

Хэрэв Ч.Мөнхбаяр үнэхээр тагнуул хийсэн юм бол, Энэтхэгийн Элчин сайдын яамны ажилтанд мэдээлэл өгч байсан нь нотлогдсон юм бол түүнд ямар хариуцлага тооцсон бэ. Гадаадын хүн тагнуул хийсэн бол хөөж гаргах ёстой. Гэтэл тийм арга хэмжээгүй аваагүй.

Иймээс Ч.Мөнхбаяр тагнуул хийсэн нь нотлогдохгүй байна” гэсэн асуудлыг хөндөж эхэллээ. Мөн үүнийг дагаад нийгмийн сэтгэл зүй хоёр хуваагдахад хүрээд байна. Товчхондоо зарим нь ТЕГ, хуулийн байгууллага Ч.Мөнхбаярт холбогдох хэргийг шалгаад, прокурорын байгууллага хянаад хоёр ч шатны шүүхээс түүнийг гэм буруутайг гээд үзчихлээ. Тэр гэм буруутай гэж байхад нөгөө хэсэг нь Монгол Улсын хуулийг зөрчсөн хэн ч хуулийн дагуу хариуцлагаа хүлээх ёстой гэдэг утгаараа Ч.Мөнхбаярын өмгөөлөгч нарын яриад буй Энэтхэгийн Элчин сайдын яамны Хоёрдугаар нарийн бичгийн дарга Шири Ражендра Жха Мананг тойрсон асуудлыг хэрхэн шийдсэнээ хуулийнхан мэдээлэх хэрэгтэй гэцгээж байна. 

Иймээс л манай хууль хяналтынхан энэ асуудалд анхаарал хандуулж Энэтхэгийн Элчин сайдын яамны ажилтантай холбоотой мэдээллийг хуулийн хүрээнд нь олон нийтэд өгөх нь зөв болов уу. Энэ хэргийг шалгаад тогтоочихсон бол Монгол Улсын хуулийг дагаж мөрдөөгүй дотно, гадны хэн ч хуулийн дагуу хариуцлага хүлээдэг гэдгийг олон нийтэд ойлгуулах, цаашлаад энэ хэрэгтэй холбоотойгоор нийгэмд үүсээд буй буруу зөрүү ойлголтыг цэгцлэх нь зөв болов уу.  

Эс тэгвэл Г.Баасан нар хүссэн үедээ гарч ирж Монгол Улсын Тагнуул, хууль хяналтын байгууллагын нэр хүндэд халдсан сөрөг мэдээллийг хийж, нийгмийг талцуулсаар магадгүй энэ асуудал цаашид даамжирвал,  Монгол Улс “эх орончдоо” хууль бусаар барьж хорьдог гэх тааруухан сэтгэгдлийг бусад улс оронд өгч мэдэх юм.