24 цаг.мн сурвалжлах баг Алтанбулаг-Хиагтын хилийн боомтоос мэдээлж байна. ОХУ-Монгол Улсыг зорих иргэдийн цуваа тасрахгүй хэвээр байгаа бөгөөд Хиагт боомтоос Алтанбулаг боомт хүртэл 8-24 цаг дараалалд зогсож байгаа талаар зорчигчид мэдээллээ.

Тодруулбал, ОХУ-ын Хиагт боомтоор орж ирж байгаа нэг машиныг дунджаар 30-40 минут шалгаж байгаа бол Монгол Улсын Алтанбулаг боомтоор нэвтрэхэд дунджаар 12 минутыг зарцуулж байна. Монгол талын хилийн боомт ачаалалгүй, хэвийн үйл ажиллагаа явуулж байгаа бол Хиагт боомтод ачаалал өндөр байна. 

Бид ОХУ-Монгол Улсын хилээр нэвтэрч байгаа иргэдээс нөхцөл байдлын талаар тодрууллаа.

Зорчигч А: "Улаан-Үд хотоос Монголын хил рүү орж ирлээ. Хэд хоногийн өмнө намайг ОХУ-ын хилрүү нэвтрэхэд ийм ачаалал байгаагүй. Гэтэл өчигдөр дараалалд орж зогсоод бүтэн 21 цаг зогсож байж Монголын хилээр нэвтэрлээ. Дараалалд зогсож байгаа иргэдийн 90 орчим хувь нь Орос, Буриад, Тува гэх мэт бага ястангууд олон байна" гэв.

Үүнтэй холбогдуулан Алтанбулаг боомтын ойролцоох зочид буудал ачаалал ихтэй байгаа талаар үйлчилгээ эрхлэгчид мэдээллээ. 

Алтанбулаг боомтын зочид буудлын үйлчилгээний ажилтан Л.Алтанцэцэг "Одоогийн байдлаар манай зочид буудлын бүх өрөө хүнтэй. Ойрын өдрүүдэд хойноос манай улсыг чиглэсэн хүмүүсийн хөдөлгөөн нэмэгдсэн. Мөн манай Алтанбулаг сумын сургуулийн 100 жилийн ой тохиож байгаа учраас хүний хөдөлгөөн ихэссэн. Тэр ч утгаараа ойрын өдрүүдэд буудлын ачаалал их байна" гэв.

Т.Мөнхжаргал