Нар хэдийнэ шингэж, улаан хаяа сүүмийхтэй зэрэгцэж бид Улаанбаатар төмөр замын өртөөнөөс Сэлэнгэ аймгийг зорилоо. Намрын урь орсон ч нар ээсэн дулаахан өдөр бид Сэлэнгэд буув. Зорьсон ажил маань хоёр улсын хилийн заагт буй. Тиймээс бид Сэлэнгэ аймгийн Алтанбулаг сумын зүг жолоо заллаа. Энд хөдөөний ууган сургуулийн 100 жилийн ой тохиож байгаа юм. Анх удаа л Алтанбулаг суманд очиж буй бид сумын дунд дуу хуур болсон газрыг эрсээр Б.Ринчен гуайн нэрэмжит тус сумын сургуулийн түүхт 100 жилийн ойн баяр дээр ирлээ. Тус сургуулийн үе үеийн төгсөгчид бололтой цагаан цамц, сурагчийн форм, гоёлын дээл өмссөн хүмүүс хэсэг хэсгээрээ гэрэл зураг татуулж байгаа харагдана. Тэр дунд ёстой л найман настай балчираас наян настай буурлууд байх нь тэр. Сургуулийн хамгийн анхны төгсөлтийн гэх 82 настай гурван эрхэм түүхт 100-н жилийн ойдоо хүрэлцэн ирсэн байв. Ийнхүү уншигч та бүхэнд Сэлэнгэ аймгийн Алтанбулаг сумын ЕБС-ын түүхт 100-н жилийн ойн баярт мөчөөс хуваалцаж байна. 

-ЕБС-ын Захирал Б.Эрдэнэ-Очир: Нэгэн зууныг үдэж, шинэ зуун руу орох түүхэн босгон дээр цахим хэлбэрт шилжсэн Сэлэнгэ аймгийн сумдын анхны сургууль боллоо-

Монгол Улсын Шинжлэх ухааны академич Б.Ринчений нэрэмжит Алтанбулаг сумын ЕБС-ийн түүхэн 100-н жилийн ой болж байна. Энэхүү баярын өдөр сургуулийнхаа хэд хэдэн бахархлыг хэлэхийг хүсэж байна. Бид Шинжлэх ухааны академич Б.Ринчений нэрэмжит сургууль гэдгээрээ бахархдаг. Энэ хүн энэ сургуульд "Дэлхийн нөхцөл байдал"-ын тухай хичээл заадаг байсан. 2015 онд түүний 110 жилийн ойгоор Алтанбулаг сумын ЕБС-ыг Б.Ринчений нэрэмжит болгож байсан түүхтэй.

Мөн үе үеийн түүхэн замналын минь алтан хэлхээ болсон төгсөгчдөөс Монгол Улсын хөдөлмөрийн баатар хоёр, Төрийн соёрхолт тав, эмч бусад төрлийн бүх гавьяатууд 26, шинжлэх ухааны доктор 10, доктор 25 төрөн гарсан эрдэм оюуны ундарга болсон сургууль юм.

Энэ олон гавьяатуудын залгамж болон явж буй олон төгсөгчид бий. Тухайлбал, рок попын дуучин н.Баярцэцэг, Холын зайн гүйлтийн ОУХМ Ч.Шинэцэцэг, Шатрын их мастер А.Энхтуул, Монголын мисс, шүдний эмч Б.Бадамцэцэг, Байлдааны самбаагийн ОУХМ Э.Адъяа зэрэг салбар салбарын хүчирхэг залуучууд энэ сургуулийн түүхийг тасралтгүй бичиж байна. Бүгдийг нь дурдах юм бол нэг цаг ч багтахгүй юм.

Нэгэн зууныг үдэж, шинэ зуун руу орох түүхэн босгон дээр бүрэн дунд боловсролын бүх анги танхимуудыг мэдээлэл технологид суурилж, бүрэн цахим хэлбэрт шилжүүлсэн анхны сургууль боллоо.

Ингээд 24цаг.мн сайтаар дамжуулан үе үеийн төгсөгчид, багш ажилтан, Сэлэнгэ аймгийн Алтанбулаг сумын иргэдээ сургуулийнхаа түүхт 100-н жилийн ойн баяр мэнд хүргэе.

-1974 оны төгсөгчдийн төлөөлөл: Дүнзэн байшинд А үсэг заалгаж байлаа-

Бид хоёр 1974 оны төгсөлт. Анх н.Дашдэндэв багшийн шавь болон дүнзэн байшинд А үсэг заалгаж байлаа. Манай сургууль тухайн үед долоон жилийн сургууль байлаа. Долоодугаар ангиа төгсөөд Сэлэнгэ аймгийн сургууль руу шилжсэн юм. Улаанбаатар хотод ач зээгээ хардаг. Гэсэн ч сургуулийнхаа 100 жилийн ойд сэтгэл хөдлөөд, зориод ирлээ. Манай ангиас нутагтаа амьдарч буй олон хүмүүс бий.

-1984 оны төгсөгчдийн төлөөлөл: Бид гурав яшил, цэцэрлэг, сургуулиа хамт төгссөн-

Бид 1984 оны н.Магамжав багштай 8а ангийнхан. Бага насаа дурсамж дүүрэн өнгөрөөсөн төрөлх сургуулийн минь 100 жилийн ой болж байгаад баяртай байна. Сургуулиа төгсөөд 38 жилийн дараа ангиараа уулзлаа. Маш сайхан байна. Манай анги тун удахгүй 40 жилийнхээ ойг 2024 онд тэмдэглэх гэж байна. Бид өнөөдрийг хүртэл Алтанбулаг сумынхаа цэцэрлэг, сургуулиар хүмүүжсэн. Бид гурав яшил цэцэрлэгээ хамт төгсөж байлаа. Энэ дашрамд ангийн хамт олондоо болон Сэлэнгэ аймгийн Алтанбулаг сумын иргэд, сургуулийнхаа үе үеийн төгсөгчдөд баяр хүргэе.

-1996 оны төгсөлтийн төлөөлөл: Хичээлийн формоо өмсөхөд сурагч нас минь бодогдож байна-

Бид н.Одонцэцэг багштай 1996 оны төгсөлт. 100 жилийн ойдоо тал талаас цуглараад, хичээлийн формоо өмсөхөд сурч байсан үе минь бодогдож байна. Манай анги 24 хүүхэдтэй төгссөн. Өнөөдөр есүүлээ цугларсан байна. Төгссөнөөсөө хойш ангийнхантайгаа уулзаагүй байж байгаад өнөөдөр уулзлаа. Мөн ангийн багштайгаа уулзаагүй удсан байна. Манай багш Орос хэл багш. Бидэнд дуу хүртэл зааж байлаа. Ингээд танай сайтаар дамжуулан ирж амжаагүй ангийнхандаа болон Алтанбулаг сумын иргэдээ 100-н жилийн ойн мэнд дэвшүүлье.

Д.Батчулуун