"Гэрийн тэжээвэр амьтны тухай хууль"-ийн төслийг УИХ-д өргөн барилаа. Энэ үеэр тус хуулийн төслийн санаачлагч УИХ-ын гишүүн Б.Энхбаяр үг хэллээ.

Тэрбээр "Энэ сэдвээс хол хөндий хүн яагаад гэрийн тэжээвэр амьтны тухай хуулийн төсөл яриад байна вэ хэмээн гайхаж байж магадгүй. Өнгөрсөн жил "Азтай савар" ТББ-аас сошиал хуудсаар надтай холбогдсон. Тухайлбал, эзэнгүй нохой, муурын асуудал, хүн, хүүхэд хазуулж, тэднийг устгахдаа харгис хэрцгий арга ашиглаж, устгаад дийлэхээ больсон, хөрсөнд булж байгаа нь экологийн болон хүний эрүүл мэндэд хортой нөхцөл байдал үүссэн талаар хэлсэн юм.

Өмнө нь энэ талаар огт сонсож байгаагүй надад сэдэв сонирхолтой санагдаж энэ нь зөвхөн амьтны тухай биш хүний тухай хууль болохыг олж мэдсэн. Монголчууд гөлгийг ч ертөнцийн гурван хөөрхөн амьтанд багтаасан. Дэлхийн 124 оронд Гэрийн тэжээвэр амьтны тухай бие даасан хуультай.

Тиймээс сайн дураараа хийж буй энэхүү ажлыг бид дэмжиж, хууль санаачилж, батлах шаардлагатай болсон. Ямар ч хүн мэдэхгүй зүйлийнхээ дайсан гэдэгтэй би хувьдаа санал нэгтэй байдаг. Гэрийн тэжээвэр амьтны талаар ойлголтгүй байсан надад итгэл үнэмшил төрж, жилд 3-4 мянгаараа хазуулж, гэмтэж байгаа асуудлыг журамлах, эздийг хариуцлагажуулах шаардлагатай байгааг хуульчилсан" гэв.

Д.Батчулуун