Өнөөдрийн улс төрийн үйл явдлын гол дуулиан Хөдөлмөр, нийгмийн хамгааллын сайд Д.Сарангэрэлийг огцруулж байгааг дуулгасан Засгийн газрын Хэрэг эрхлэх газрын дарга Д.Амарбаясгалангийн мэдэгдэл байлаа. Зорилтот бүлгийн иргэдийг Хөдөлмөр, нийгмийн хамгааллын сайд нь “улны айлынхан” хэмээн нэрлэсэн нь Үндсэн хуулийг зөрчсөн хэмээн Ерөнхий сайдын захирамжаар Д.Сарангэрэл сайдыг чөлөөлсөн.

Дааганаас унаж үхдэггүйн үлгэрийг давтсан Д.Сарангэрэл сайдын энэ кэйс нэг талаар томилогдсон албан тушаалтнууд энгийн иргэдийг хэрхэн “дээрээс харж” доромж өнгөөр ярьдгийг нийгэмд харуулсан бол нөгөө талаас улс төрд үүр цайж эхлэснийг сануулсан явдал боллоо.

Учир нь, өмнө нь иймэрхүү дүр зураг томилогдсон албан тушаалтнуудаас гардаг байсан ч хариуцлага хүлээж байсан нь ховор. Харин энэ удаа наяад оны Ерөнхий сайд, Засгийн газрын Хэрэг эрхлэх газрын дарга шуурхай хариуцлага хүлээлгэж байгаа нь эерэг өнгө аяс байлаа. Харамсалтай нь, Үндсэн хууль зөрчсөн, хүнийг гарал үүсэл ажил мэргэжлээр нь доромжилдог энэ байдал хаа сайгүй гаарсан ажээ.

Д.Сарангэрэл сайдынхтай яг ижил нэгэн кэйс түүний дуулианаар чимээгүй дарагдах гэж байна. Увс аймагт болсон ИТХ-ын уулзалтын үеэр тус аймгийн засаг дарга Ч.Чимэд төрийн албан хаагчдыг “даргын зарц” хэмээн дууджээ. Тодруулбал, “би оруулж ирж байгаа бүх асуудалдаа эзэн болоод сууж байгаа. Чи бас дарга юм бол эзэн болоод суу. Би чамд захья. Чи ямар олон зарцтай байна. Би чамаас олон зарцтай мөртлөө бүгдийг ойлгоод, өөр дээрээ хариуцлагаа аваад эрхээ ч эдэлж байна, үүргээ ч биелүүлээд явж байна. Чи дарга хийвэл хийсэн шиг хий” хэмээн Увс аймгийн Аудитын газрын даргад хэллээ. Үүний хариуд тэрбээр “Надад зарц байхгүй, ажилтнууд л байгаа” хэмээв. Ерөнхий сайд аа, одоо төрийн албан хаагчдыг ингэж зарцаа хэмээн боддог Засаг даргыг огцруул.

Т.Мөнхжаргал