Фиделитас Партнерс ХХК “Ковидын үед гадаадаас эх орондоо ирсэн иргэдийг 35 хоног тусгаарласан нь хууль бус болохыг тогтоолгох, түүний улмаас иргэнд учирсан хохирлыг барагдуулах” шаардлагын талаар мэдээлж байна. Энэ үеэр Фиделитас Партнерс ХХК-ийн гүйцэтгэх захирал Б.Наранцэцэг мэдээлэл өглөө. 

Тэрбээр "Коронавирусын үед Улсын онцгой комиссоос тусгаарлан ажиглах хоног тогтоосон 15 шийдвэр гаргасан байдаг. 2020 оны гуравдугаар сарын 26-ны 14 дүгээр тэмдэглэл, дөрөвдүгээр сарын 9-ны 15 дугаар тэмдэглэлд хууль бус байсан.  Хуульд заагаагүй хэм хэмжээний актыг дагаж мөрдүүлээд хүний зорчих эрхийг хязгаарлаж, үүний улмаас тусгаарлалтын байранд төлсөн төлбөр нь хохирол болсон байна гэдэг байдлаар маргаан өрнүүлсэн. Энэ нь хэм хэмжээний акт учраас давж заалдах шатны шүүхэд анх нэхэмжлэл гаргасан.

Давж заалдах шатны шүүхээс 2022 оны тавдугаар сарын 3-ны өдөр шүүхийн шийдвэр гаргасан. Тухайн шийдвэрт дэлхий нийтэд цар тахлын асуудал дэгдэж, хөл хориотой байсан байхад үүний эсрэг Улсын онцгой комиссоос авч хэрэгжүүлсэн арга хэмжээг буруутгах аргагүй. 21 хоног тусгаарлана гэж тогтоосныг шүүхээс зөв, буруу гэж дүгнэх үндэслэл байхгүй гэсэн дүгнэлт хийж, нэхэмжлэлийг хэрэгсэхгүй болгосон.  

Хөл хорионд орсон 24 мянган иргэний асуудал байгаа. Тухайн иргэдийн тусгаарлах байранд төлсөн төлбөрийг барагдуулах ёстой талаарх Хүний эрхийн үндэсний комиссын шаардлага гарч байсан. Уг иргэд хууль ёсоор хүчин төгөлдөр болоогүй шийдвэрээр зорчих эрхээ хязгаарлуулсан. УОК-ын шийдвэр нь захиргааны шийдвэр гаргах журам, бүх шаардлагыг зөрчсөн байгаа юм. Гэтэл шүүхээс шийдвэр гаргахад захиргааны байгууллагын дагаж мөрдөх хэм хэмжээ талаас нь дүгнэлт хийгээгүй.  Гомдлын дагуу хэргийг эцэслэн шийдвэрлэх найм дахь удаагийн хурал болох гэж байна" гэв. 

Д.Батчулуун