Засгийн газрын хуралдаанаас гарсан шийдвэрийг танилцуулж байна. Энэ үеэр Эдийн засаг, хөгжлийн сайд Ч.Хүрэлбаатар мэдээлэл өглөө.

Тэрбээр “2023 оны нэгдсэн төсвийг өргөн барих гэж байна. Энэ бол Монгол Улсын эдийн засгийн өнөөгийн нөхцөл байдалтай нягт уялдаж явах ёстой. Хагас жилийн байдлаар Монгол Улсын эдийн засгийн өсөлт 1,9 хувьтай байгаа. Мөн дотоодын нийт бүтээгдэхүүний үнэ 2,6 хувь өснө хэмээн тооцож байна.

Инфляц өнөөдрийн байдлаар 14,4 хувь байгаа. Бидний тооцоогоор ирэх жилийн хоёрдугаар хагсад нэг оронтой тоо руу оруулах боломжтой хэмээн харж байна. Инфляцад тулгамдаж буй хамгийн том эрсдэл бол төгрөгийн ханшны уналт байгаа юм. Мөн Монгол Улсын эдийн засгийн салбарууд ямар байдалтай байгааг судалж үзсэн. Тухайлбал, хөдөө аж ахуй, уул уурхай, барилга, тээвэр зэрэг салбаруудыг авч үзсэн. Уул уурхайн салбарын үйлдвэрлэл уналттай харагдаж байгаа. Гэхдээ 2023 онд өснө хэмээн харж байна.

Экспортын хэмжээ цар тахлын өмнөх хэмжээнд хүрээгүй. Харин 2023 онд үеийн хэмжээнд экспортыг өргөж гаргана гэдэг бодлогыг барьж байна.

Монгол Улсын хувьд гадаад валютын албан нөөц дууссан. Үндсэндээ оны эхэнд 4,4 тэрбум ам.доллар байсан валютын нөөц өнөөдөр 2,4 тэрбум ам.долларын нөөцтэй болсон. Үүнтэй холбоотойгоор түр зуурын арга хэмжээнүүдийг авч хэрэгжүүлэхээр төлөвлөж байна. Засгийн газрын авч хэрэгжүүлж буй арга хэмжээнүүдийн үр дүнд экспортын хэмжээ нэмэгдэж байгаа.

Экспортоор нүүрс гарахад доллар нь орж ирж байх нүүрсийг гаргах зохицуулалтын арга хэмжээ авч хэрэгжүүлж байна. Мөн мөнгөний нийлүүлэлт буурсан. Арилжааны банкнуудаас гаргаж буй зээлийн хэмжээ буурсан. Үүний зэрэгцээ ард иргэд хадгаламжаа хэрэглээндээ оруулаад эхэлсэн. Тиймээс хадгаламжийн хэмжээ 2,9 их наяд төгрөгөөр буурсан. Энэ нь ард иргэдийн бодит орлого буурч байгааг харуулж байна" гэв. 

Д.Батчулуун