УИХ-ын чуулганы хуралдаан үргэлжилж байна. Хуралдаанаар Намрын ургац хураалт болон өвөлжилтийн бэлтгэл хангах чиглэлээр авч хэрэгжүүлж байгаа арга хэмжээний талаар хэлэлцэж байна. Энэ үеэр УИХ-ын гишүүн Ц.Туваан үг хэлж, асуулт асуулаа. 

Тэрбээр “Монгол Улсын хэмжээнд төвийн бүс, зүүн талдаа зуншлага сайн байсан. Харин баруун аймгуудад зуншлага тааруу байсан. Зуншлага гайгүй аймгууд руугаа отор нүүдэл хийж байгаа. Хаа хаанаа эрсдэл авчирдаг. Оторын асуудалд Засгийн газраас гаргасан шийдвэр байгаа юу гэдгийг асуумаар байна. Зуншлага намаржаа муудаад ирэхээр хадлан хадах нь хүнд болсон. Халуун намраар өвсний үнэ арван мянга гарчихсан. Өвөлжилт хүндэрвэл өвсний үнэ өсөхөөр байна. 

Монголчууд бүгд хэрэглээд хэрэглээд 15 сая толгой мал хэрэглэнэ. Үлдсэн мал илүүднэ.

Энэ илүү гарч буй малыг яах юм бэ. Экспорт хангалттай биш байгаа. Махны үнэ борлуулалтад ямар арга хэмжээ авч байна вэ. Гаднынхны хэлж буй нэг л зүйл бий. Танайд нэг цонхоор нэгдсэн зохион байгуулалттай явдаг зүйл алга гэдэг.

Мал эмнэлэг дээр их учир байна. Гарсан өвчнийг хэдэн сая төгрөгөөр эмчиллээ гээд байх юм. Өвчин тусахаас нь өмнө урьдчилан сэргийлэх хэрэгтэй” гэв.

Д.Батчулуун