Түгжрэлийг бууруулах үндэсний хорооны дарга, сайд Ж.Сүхбаатар олон улсын нэр хүнд бүхий мэргэжлийн зөвлөх компани болох “PwC” (“Pricewaterhouse Coopers”) компанийн Евроазийн бүс нутгийн зөвлөх үйлчилгээ хариуцсан төлөөлөгч Наталъя Лим болон бусад албаны хүмүүстэй түгжрэл бууруулах чиглэлээр амжилттай ажилласан төсөл хөтөлбөрүүдийн тухай мэдээлэл сонсож, санал солилцжээ.

Тэрбээр "Нэн тэргүүнд хийгдэх ажил нь нийтийн тээврийн парк шинэчлэл, салбарын үйлчилгээ, зохион байгуулалтыг сайжруулах тухай юм.

Нийтийн тээврийн салбарт бодлогын шинэчлэл хийснээр түгжрэлийг бууруулах сонголттой тээврийн боломж нөхцөл бүрдэнэ гэж бид тооцоолж байгаа.

Замын хөдөлгөөний зохицуулалт, хяналтыг сайжруулахад анхааран ажиллаж байна.

Түгжрэлийн эсрэг багц хуулийн төслийг УИХ-аар хэлэлцүүлэхээр төлөвлөн боловсруулж байна. Олон нийтийн, тэр дундаа жолооч нарын хандлагыг өөрчлөхөд холбогдох байгууллагуудтай хамтран ажиллаж байгаа" гэсэн мэдээллийг өгчээ.

Казахстан улсын Алматы хот нь авто замын түгжрэлийг хэрхэн бууруулж чадсан туршлагыг хатагтай Наталъя Лим хуваалцсан байна.

2.5 сая хүн амтай Алматы хотын хувьд авто замын түгжрэлийг бууруулахад нэн тэргүүнд анхаарсан асуудал нь “BRT”, “LRT” мөн метрог эртнээс төлөвлөж шийдэхийн сацуу явган хүний болон унадаг дугуйн замыг бүрэн шийдсэнээр тус хот авто замын түгжрэлээ бууруулж чаджээ.

Цаашид Улаанбаатар хотын замын түгжрэлийг бууруулахад бусад улс оронд амжилттай хэрэгжүүлсэн туршлага дээрээ үндэслэн хамтран ажиллахад бэлэн гэдгээ Наталъя Лим илэрхийлсэн байна.

Түгжрэлийг бууруулах үндэсний хорооны дарга "Нийслэл Улаанбаатар хотын авто замын түгжрэлийг бууруулахад онцгой үр дүнд хүрэх нэгэн чухал төсөл нь BRT-г нэвтрүүлэх ажил хэмээн төлөвлөж байна" гээд Монголтой маань дөхүү Казахстаны Алматы хотын авто замын түгжрэл бууруулах туршлагаас судалж, хамтран ажиллах сонирхлоо илэрхийлжээ.