МАН-ын бүлэг мэдээлэл хийж байна. Энэ үеэр Эдийн засгийн хөгжлийн сайд Ч.Хүрэлбаатар мэдээлэл хийлээ.

Тэрбээр “Миний бие сайдаар томилогдоод хоёр сар болж байна. Ажил авч байх үед Монгол Улсын валютын нөөц 2.5 тэрбум америк доллар байсан. Зах дээр байгаа албан бус ханшны зөрүү нь 200-300 төгрөг байсан. Арилжааны банкууд зарж байгаа валютын хязгаарлалт хоногийн нэг сая төгрөгөөс дээш олгохгүй гэх нөхцөл байдалтай байсан.

Харин өнөөдөр валютын нөөц 2.8 тэрбум болсон. Нэг саяын хязгаарлалт зарим банканд 10 сая, 20 сая төгрөг болон нэмэгдсэн. Мөн Ханшны зөрүү 5, 10 төгрөгийн хооронд хэлбэлздэг болж өөрчлөгдсөн. Үүнд бид гурван арга хэмжээ авч хэрэгжүүлсэн.

Тухайлбал, Засгийн газрын тэмдэглэл, Засгийн газрын 362 дугаар тогтоол, Эрдэнэс тавантолгой дээр тусгай дэглэм тогтоох гэсэн гурван арга хэмжээг авч хэрэгжүүлж, Монгол Улс руу орох валютын нөөцийг нэмэгдүүлэх арга хэмжээ авч байгаа. Тогтолцоог бий болгоё. Ямар компани ямар хэмжээтэй, ямар дүнтэй гэрээ хийсэн бэ гэдэг нь бүртгэгдсэн байх хэрэгтэй.  

Хоёрдугаарт, зарагдаж байгаа нүүрсний үнийг нэмэгдүүлэх зорилготой. Яаж нэмэгдэх вэ гэвэл үнээр өрсөлддөг байх. Хаалттай хаалганы цаана хоёр хүний сууж байгаад гаргасан үнийн дүн нэмэгдэхгүй шүү дээ. Валютын нөөцийг нэмэгдүүлэх чиглэлээр аж ахуй нэгжүүдэд үүрэг өгөгдсөн.

Гэрээнүүдийнхээ дагуу тодорхой доллар төлж нүүрсээ авах зэрэг нөхцөлүүд тавигдаад явж байна. Ингэснээр он дуустал Эрдэнэс Тавантолгойг 500 сая ам.долларыг оруулж ир гэсэн үүрэг өгөгдсөн. Одоогоор 140 сая ам.доллар ороод байна. Мөн Эрдэнэс үйлдвэрт 300 сая ам.долларыг оруулах үүрэг өгсөн. Одоогоор 150 сая ам.долларын валют оруулаад явж байна. Оюу-Толгой компани дээр 500 сая ам.долларыг оруулахаас 240 сая ам.долларыг оруулаад явж байна. Ингэснээр валютын урсгалыг нэг тэрбум ам.доллароор нэмэгдүүлэх зорилт тавиад ажиллаж байна” гэв.

Д.Батчулуун