АНУ-ын Монголч эрдэмтэн, профессор Жак Уэтерфорд Монголд иржээ. Тэрбээр АНУ-ын Миннесота мужийн Макалейстер коллежийн Антропологийн тэнхимийн тэргүүн, Чингис хаан дээд сургуулийн хүндэт доктор, профессор юм. Түүний монголчуудын тухай бичсэн “Монголын Их Хатдын Нууц Товчоо”, “Өнөөгийн ертөнцийг үндэслэгч эзэн Чингис хаан” номууд нь даруй 30 гаруй хэлээр хэвлэгдсэн байдаг. Тэгвэл АНУ-ын Монголч эрдэмтэн Жак Уэтерфорд Ерөнхийлөгчийн урилгаар өчигдөр Монголд ирсэн байна.

Түүнийг Монголд ирсэн энэ мөчид буюу энэ долоо хоногийн Пүрэв гарагт "Чингис хаан" одонгийн эзэн тодрох юм. Иймд уламжлалын дагуу гардуулдаг Төрийн дээд, тэргүүн зэргийн “Чингис” хаан одонгоор хэн энгэрээ мялаах бол гэх хүлээлт олон нийтийн дунд үүсээд буй. Тэгвэл энэхүү одонг АНУ-ын Монголч эрдэмтэн Жак Уэтерфордод хүртээж магадгүй байна.

Чингис хаан одонг 2005 оноос олгож эхэлсэн бөгөөд жил бүр нэг хүнийг энэхүү одонгоор шагнадаг. Харин профессор Жак Уэтерфорд энэхүү одонг хүртвэл "Чингис хаан" одонг хүртсэн анхны гадаад хүн болох юм. 

Монголчууд түүнийг “Өнөөгийн ертөнцийг үндэслэгч Чингис хаан” хэмээх номын зохиогч гэдгээр нь сайн мэддэг билээ.

Түүний 2004 онд бичин хэвлүүлсэн “Өнөөгийн ертөнцийг үндэслэгч Чингис хаан” ном нь олон улсад танигдаж, одоогоор 20 гаруй улсын хэлээр орчуулагдаад байгаа билээ.  Мөн тэрбээр 2010 онд “Монголын их хатдын нууц товчоон”, 2016 онд “Чингис хаан ба бурхны эрэлд: Дэлхийн хамгийн шилдэг эзэн хаан хэрхэн бидэнд шашны эрх чөлөөг өгсөн нь” бүтээлийг тус тус туурвисан. “Монголын их хатдын нууц товчоон” ном бол Чингис хааны охидын талаар бичсэн анхны ном юм.

Д.Батчулуун