Төрийн дээд, тэргүүн зэргийн "Чингис хаан" одон  Жэк Уэтерфорд, Д.Доржготов нарын энгэрт гялалзаж буй. Энэ үеэр Жэк Уэтерфорд сэтгэгдлээ хуваалцлаа.

Тэрбээр "Би 25 жилийн өмнө Монгол Улсад анх ирж байсан. Тухайн үед Монгол Улсын тухай болон Чингис хааны тухай ном зохиол бичнэ гэж бодоогүй байсан. Монгол Улс миний зүрх сэтгэлийг маш их хөдөлгөсөн учраас ном бичихээр шийдвэрлэсэн.

Энэхүү шагнал бол миний хувьд сар мэт хол санагдаж байлаа. Өөрийгөө энэхүү шагналыг авна гэж төсөөлж байсангүй. Ялангуяа залуу Ерөнхийлөгчөөс энэхүү шагналыг гардаж авсандаа баяртай байна. Үлдсэн амьдралаа Монгол судаллын төлөө зориулах болно. 

Чингис хаан шинэ шашин зохиогоогүй, харин Мөнх тэнгэрийн зарлигаар бүх шашинд эрх чөлөө олгосон. Шашин тус бүр дээр бурхны мутрын хуруу төдий байсныг Чингис хаан нэгэн цул болгож, хүн төрөлхтний нэгдмэл хүсэл мөрөөдөл болох даян дэлхийн амар амгаланг тогтоосон.

Дэлхий өнөөдөр ч тэр хүсэл зорилгодоо хүрэхээр тэмцсээр байна. Чингис хааны хуулийг үргэлжлүүлэхийн төлөөх үйлс тэмцлийнхээ, Монголын их амар амгаланг тогтоох мөрөөдөлдөө тэмүүлсэн ес дэх зуунаа хүн төрөлхтөн элээж явна.

Ес бол үлэмж бэлгэдлийг шингээсэн тоо. Чухам энэ зуунд монголчууд Чингис хааны мөрөөдлийг биелүүлэх замыг дөтлөн, эх дэлхийдээ тусалж чадна гэдэгт би итгэдэг. 

Чингис хааны ариун газар шороог, Чингис хааны үр хойчийг Монголын мөнх хөх тэнгэрийн алтан гэрэлт цацраг үүнд гийгүүлж байхыг ерөөж залбирч байна" гэв. 

Д.Батчулуун