2022 оны хөлбөмбөгийн ДАШТ эдгээр өдрүүдэд үргэлжилж байна. Хэсгийн тоглолтууд дундаа орж дэлхийн шилдэг багууд ээлж дараалан хожигдож буй энэ цаг үед өнгөрсөн амралтын өдрүүдэд өрнөсөн тоглолтуудаас онцлох сонирхууштай найман үйл явдлыг хүргэж байна.
Нэг. Германы чухал гоол
Никлас Фюллькруг өнгөрсөн жил Германы хөлбөмбөгийн хоёрдугаар лигт тоглож байсан ч энэ улиралд тэрбээр Бундеслигийг оруулсан гоолоороо тэргүүлж байгаа төдийгүй ДАШТ-д Испанийн шигшээ багийн эсрэг маш чухал гоолыг орууллаа.
Хоёр. Дэлхийн аваргуудын тэнцэл
Өнгөрсөн өдөр болсон тоглолтод Е хэсэгт багтсан Герман, Испанийн шигшээ багууд хоорондоо оноолт таарч, тэнцээгээр өндөрлөлөө. Тоглолтын 62 дахь минутад Испанийн шигшээ багаас Альваро Мората гоол оруулсан бол 83 дахь минутад Германы шигшээ багийн тоглогч Никлас Фюллькруг гоол оруулж тооны харьцааг тэнцүүлсэн юм. Энэхүү тэнцээ нь нэг хожигдолтой яваа Германы шигшээ багийн хувьд муу мэдээ болоод буй.
Гурав. Дубайн гайхамшиг
АНЭУ-ын Дубай хот дахь Бурж Аль Халифа буюу дэлхийн хамгийн өндөр барилга Мароккогийн шигшээ багийн хожлын дараа Мароккогийн далбааны өнгөөр гэрэлтэв. Тус баг өчигдрийн тоглолтод Бельгийн хүчирхэг багийг 2:0 харьцаатай буулган авсан юм.
Дөрөв. Мессигийн ээлжит дуулиан
MLS лигийн Интер Майами клуб Лионель Месситэй гэрээ байгуулахад маш ойрхон ирээд байгаа ажээ. Хэрэв энэ гэрээ байгуулагдвал тэрбээр MLS-ийн түүхэн дэх хамгийн үнэтэй тоглогч болох юм байна.
Тав. Хорватын шигшээ баг Канадыг бут цохив
Өчигдөр болсон F хэсгийн тоглолтод өнгөрсөн дэлхийн аваргын дэд байрт шалгарсан Хорватын шигшээ баг Канадын эсрэг тоглож 4:1 харьцаатай бут ниргэв. Тоглолтод Хорватын шигшээ багаас Андрей Крамарич, Ловра Мажер, Марко Ливажа нар орууллаа.
Зургаа. Онцлох гоол
Канадын шигшээ багийн тоглогч Алфонзо Дэвис 2014 оны шигшээ тоглолтын Марио Гөтцэгээс хойш дэлхийн аваргад гоол оруулсан анхны Байерн Мюнхен багийн тоглогч боллоо. Канадын шигшээ багийн өчигдрийн тоглолтын цорын ганц гоолыг тэр оруулав.
Долоо. Ээж ээ
Мароккогын шигшээ багийн тоглогч Ашраф Хакими Бельгийн шигшээ багийг хожсоныхоо дараа ээжтэйгээ баяраа хуваалцан, үнсүүлж буй зураг сэтгэл хөдөлгөм байлаа.
Найм. Япон тоглогчийн шилбэний хамгаалалт
Японы шигшээ багийн тоглогч Гаку Шибасаки анимийн зураг бүхий шилбэний хамгаалалт зүүжээ. Тэд өчигдөр Коста Рикагийн шигшээ багт хожигдсон юм.
Л.Сайнаа
