Дэлхийн аварга шалгаруулах тэмцээний А болон В хэсгийн гуравдугаар тойргийн тоглолтууд өнгөрсөн шөнө болж шөвгийн 16 буюу дараагийн шатанд шалгарах багуудын нэрс тодорлоо. Энэ мэтчилэн онцлох мэдээллүүдийг багцлан хүргэж байна.
Нэг. Дарамт
Ираны шигшээ багийн тоглогчдыг хэрэв тэднийг АНУ-ын эсрэг хийх тоглолтын өмнө төрийн дууллаа дуулахгүй бол гэр бүлийг нь шоронд хорьж, эрүүдэн шүүнэ хэмээн заналхийлсэн гэж CNN агентлагаас мэдээлжээ.
Хоёр. АНУ-ын шигшээ баг таамаг эвдлээ
В хэсгийн хоёроор жагсаж байсан Ираны шигшээ баг өнгөрсөн шөнийн тоглолтод АНУ-ын шигшээ багт 1:0 харьцаатай хожигдлоо. Ингэснээр АНУ-ын шигшээ баг хэсгээсээ хоёроор гарч, А хэсгийн Нидарландын шигшээ багтай дараагийн шатанд оноолт таарлаа.
Гурав. Англи хэсэгтээ тасархай тэргүүлэв
Өчигдөр болсон тоглолтод Английн хүчирхэг баг нутаг нэгтэн Уэльсийн шигшээ багийг 3:0 харьцаатай хожиж, долоон оноотой, нэг ч хожигдолгүй хэсгээ тэргүүллээ. Хэсгийн хоёрдугаар байраар АНУ-ын шигшээ баг гарлаа.
Дөрөв. Анхны талбайн эмэгтэй шүүгч
Стефани Фраппарт ДАШТ-ий талбайн шүүгчээр ажиллах хамгийн анхны эмэгтэй болжээ. Тэрбээр 1983 онд төрсөн, 38 настай бөгөөд Францын иргэн юм.
Тав. Нидерланд хэсгээ тэргүүлж, Сенегалчууд чухал хожил авлаа
А хэсгийн тоглолтуудын гурван тойргийн дараах байдлаар Нидерландын шигшээ баг хэсгээ тэргүүлж, Сенегалын шигшээ баг хэсгийн хоёрт бичигдэж байсан Эквадорын шигшээ багийг 2:1 харьцаатай буулган авснаар хэсгийн хоёрдугаар байраар дараагийн шатанд шалгарлаа. Тус баг шөвгийн 16-д Английн хүчирхэг багтай нүүр тулна.
Зургаа. Алтан шаахайн төлөөх өрсөлдөөн
Энэ удаагийн ДАШТ-ий хамгийн олон гоол буюу гурван гоолыг Нидерландын шигшээ багийн тоглогч Коди Гакпо, Францын шигшээ багийн тоглогч Мбаппе нар оруулаад байна. Тэдний араас хоёр гоолтой Португалын Фернандес, Солонгосын Чо, Месси, Сака, Жиру, Морота зэрэг шилдгүүд бичигдэж байна.
Долоо. Англичуудын шинэ амжилт
Английн шигшээ багаас зургаан өөр тоглогч энэ удаагийн ДАШТ-д гоол оруулсан нь тэдний хамгийн олон өөр тоглогч нэг ДАШТ-д гоол оруулсан тохиолдол ажээ. Тэдгээрт Рэшфорд, Сака, Беллингхэм, Стерлинг, Гриллиш, Фоден нар багтана.
Л.Сайнаа
