Манай сайтын цоо шинэ булан болох “Долоо хоногийн онцлох хүн” буланд уншигч та бүхэн тавтай морилно уу. Бид энэхүү буландаа тухайн долоо хоногт олны анхаарлыг татсан нэгнийг онцлох юм.

Энэ долоо хоногийн онцлох хүнээр УИХ-ын гишүүн Б.Энхбаярыг нэрлэж байна.

УИХ-ын хяналт шалгалтын хууль батлагдсанаас хойш жил гаруйн хугацаанд парламент хэд хэдэн түр хороо байгуулж Ерөнхий сонсголыг зохион байгуулсан. Харин өнгөрсөн долоо хоногийн турш болсон Хөгжлийн банкны Ерөнхий сонсголыг Түр хорооны дарга Б.Энхбаяр жишиг болохуйц гэж хэлж болохоор маш сайн зохион байгуулж чадлаа. Түр хорооны сонсголоор Хөгжлийн банкаас шууд зээл авсан компаниудын 175 гэрчийн мэдүүлгийг улс даяараа нээлттэйгээр сонсож чадлаа.

Хөгжлийн банкны мөнгийг эрх мэдэлтнүүдээр дамжуулан хамаарал бүхий этгээдүүд нь, найз нөхөд нь хэрхэн гарын салаагаар урсгасныг энэ удаагийн сонсгол өнгө будаггүйгээр ил гаргаж өгснөөрөө онцлог байлаа.

Сонсголд хэрхэн сайн бэлдэж болдгийг, хэрхэн сайн зохион байгуулж болдгийг, бас хэрхэн сайн мэргэжилтнүүдийг ажлуулж чаддагийг Хөгжлийн банкны түр хорооны дарга Б.Энхбаяр харуулж чадлаа.

Хамгийн гол нь сүүлийн үеийн имижээ поп маягаар бүрдүүлээд байсан МАН-ын залуу хуульч Б.Энхбаяр эргээд улс төрд анх хөл тавьж байсан үеийнх шигээ итгэл найдварыг иргэдэд асааж чадлаа. Тэр нь худал хуудуйтай тэмцэж чадах улстөрч цөөхөн ч гэсэн байдаг гэдэг итгэл. Аалзны тор мэт хэрсэн Хөгжлийн банкны хэрэгт холбогдоогүй улстөрчид байдаг юм байна, бас холбоотой хэдийнхээ дарамт шахалтаас ангид хэргийг үнэн зөвөөр нь ил гаргах хүсэлтэй улстөрчид байдаг юм байна гэдгийг харуулснаараа энэ удаагийн сонсголын ач холбогдол өндөр байна.

Ерөнхий хорооны сонсголын үеэр үе үе цухалзсан “Хуульчийн амбиц”-ыг нь эс тооцвол Хөгжлийн банкны түр хорооны дарга Б.Энхбаярт халуун баяр хүргэх нь зүйн хэрэг.

Д.Батчулуун