Замын хөдөлгөөний удирдлагын төв дээр Зайсангийн тойрууг 1 чигийн хөдөлгөөнд оруулсантай холбогдуулан нөхцөл байдал ямархуу байгаа, хичээл сургууль эхлэхэд авах арга хэмжээний тухай мэдээллийг өгч байна. Энэ үеэр Замын хөдөлгөөний удирдлагын төвийн Хөдөлгөөн зохицуулалт, хяналтын хэлтсийн дарга Н.Намуу мэдээлэл өглөө. 

Тэрбээр "Энэ сарын 21-нээс Зайсангийн уулзварын өөрчлөлтөөс хойш уулзварын нэвтрүүлэх чадвар ямар нэгэн хүлээлтгүй болсон. Хөдөлгөөний эрчмийг 35 хувиар нэмэгдүүлнэ хэмээн тооцоолж байсан. Энэ нь цагт хэчнээн тээврийн хэрэгсэл тухайн уулзварыг нэвтэрч буй тоон үзүүлэлтэд юм. 

Замын цагдаа таталт хийх шаардлагагүйгээр, тээврийн хэрэгслүүд тогтмол жигд хурдаар тэнцвэртэй зорчилт хийж буй үр дүн гарсан.

Өмнө нь 1668 тээврийн хэрэгсэл уулзвараар нэвтэрч байсан бол өөрчлөлт оруулсны дараа 2414 автомашин нэвтэрч урсгал 44 хувиар нэмэгджээ. Мөн өдрийн оргил цаг буюу цайны цагаар 2255 тээврийн хэрэгсэл нэвтэрч байсан бол даваа гарагт 2616 тээврийн хэрэгсэл нэвтэрсэн байна. Нэгдүгээр сарын 16-нд 17-18 цагийн хооронд буюу оргил ачааллын үед 1326 тээврийн хэрэгсэл нэвтэрч байсан бол өөрчлөлтийн дараа 2644 автомашин буюу 84 хувиар нэмэгдсэн үр дүнтэй байна. Жишээ нь өнөө өглөөний 7-8 цагийн байдлаар тус замын урсгал 26 хувиар нэмэгдсэн" гэв. 

Д.Батчулуун