2023 он гарснаар улс, аймгийн алдар цолтой болон цолгүй бөхчүүдийн нийт таван барилдааныг Монголын Үндэсний бөхийн холбооноос зохион байгуулжээ.

Тус барилдаануудын түрүү, үзүүрийг танилцуулж байна.

2023 оны нэгдүгээр сарын 7- Шинэ оны нээлтийн барилдаан

ЦОЛГҮЙ ЗАЛУУ БӨХЧҮҮДИЙН АНХДУГААР БАРИЛДААН

Цолгүй залуу бөхчүүдийн анхдугаар барилдаанд улс, аймаг, сумын цолгүй 336 бөх хүчийг үзэн барилдсанаас Ховд аймгийн Мянгад сумын харьяат, залуу бөх Лхагвын Сайханбилэг ес даван түрүүлж, Архангай аймгийн Хотонт сумын харьяат, сумын цолтон залуу бөхчүүдийн барилдааны 11-р сарын түрүү, залуу бөх Батхуягийн Гончигсүрэн үзүүрлэв.

2023  нэгдүгээр сарын 8

СУМЫН ЦОЛТОЙ БОЛОН ЗАЛУУ БӨХЧҮҮДИЙН БАРИЛДААН

Сумын цолтон болон залуу бөхчүүдийн шинэ оны эхний барилдаанд 544 бөх уран мэх, авхаалж самбаа сорин барилдсанаас Говь-Алтай аймгийн Дэлгэр сумын харьяат, “Хантайшир” дэвжээ, “Аврагч” спорт хорооны бөх, сумын заан Энхжаргалын Дашдэмбэрэл анх удаагаа түрүүлж, Увс аймгийн Бөхмөрөн сумын харьяат, сумын заан Энхбаярын Амартүвшин анх удаагаа шөвгөрч, улмаар үзүүрлэлээ.

2023 оны нэгдүгээр 13

ШИНЭ ҮНДСЭН ХУУЛЬ БАТЛАГДСАНЫ 31 ЖИЛИЙН ОЙН БАРИЛДААН

Үндсэн хууль батлагдсаны 31 жилийн ойд зориулсан Улс, аймгийн алдар цолтой бөхчүүдийн эхний барилдаанд 128 бөх барилдсанаас Хэнтий аймгийн Өмнөдэлгэр сумын харьяат, “Хан-Хэнтийн аварга” дэвжээний бөх, улсын арслан Энхтөгсийн Оюунболд түрүүлж, Завхан аймгийн Яруу сумын харьяат, “Хилчин” спорт хороо, “Жем интернэшнл” ХК, “Даян” дэвжээний бөх, улсын заан Мөнхтөрийн Лхагвагэрэл үзүүрлэв.

2023 оны нэгдүгээр сарын 21

“ХАЙРХАН” НИЙСЛЭЛИЙН НЭГДСЭН ЗАХЫН НЭРЭМЖИТ, МОНГОЛ УЛСЫН НАЧИН ЦОЛНЫ ХҮНДЭТГЭЛИЙН БАРИЛДААН

Хайрхан-Нийслэлийн нэгдсэн захын нэрэмжит "Монгол Улсын начин цолны хүндэтгэл"-ийн барилдаанд улс, аймгийн алдар цолтой 256 бөх уран мэх, авхаалж самбаа сорин барилдсанаас Архангай аймгийн Батцэнгэл сумын харьяат, “Алдар” спорт хороо, “Сокол” ХХК, “Хатант интернэшнл” ХХК, “Бөхбилэгт” дэвжээний бөх, улсын үнэн зоригт харцага Батсүхийн Зоригтбаатар түрүүлж, Булган аймгийн Орхон сумын харьяат, “Хилчин” спорт хороо, “Кардеш” ХХК, “Дээдсийн жигүүр” ХХК, “Булганхан” дэвжээний бөх, улсын начин Булган-Эрдэнийн Түмэндэмбэрэл үзүүрлэв.

2023 оны нэгдүгээр сарын 22

“ТАЛХ ЧИХЭР” ХК-ИЙН “ХЭВИЙН БООВНЫ БАЯР” УЛАМЖЛАЛТ БАРИЛДААН

Талх Чихэр ХК-ийн “Хэвийн боовны баяр” уламжлалт 17 дахь удаагийн аймаг, цэргийн цолтой болон залуу 256 бөхийн барилдаанд Сэлэнгэ аймгийн Хүдэр сумын харьяат, “Алдар” спорт хороо, “Баатар дулаан хан” ХХК, “Таван-Хан” дэвжээний бөх, аймгийн хурц арслан Даваадоржийн Төрболд түрүүлж, Хөвсгөл аймгийн Бүрэнтогтох сумын харьяат, “Алдар” спорт хороо, “ДЦС-4” ТӨКХ, “Хөвсгөлийн хүчтэн” дэвжээний бөх, аймгийн арслан Энхтөрийн Баасанжав үзүүрлэв.

Энэ амралтын өдрүүдэд буюу нэгдүгээр сарын 28-ны бямба гарагт 12:00 цагаас Архангай аймгийн Цэнхэр сумын 100 жилийн ойд зориулсан "Эко констракшн" ХХК-ийн нэрэмжит улс, аймгийн алдар цолтой 256 бөхийн барилдаан, нэгдүгээр сарын 29-ний ням гарагт 12:00 цагаас "Малчин" телевиз үүсэн байгуулагдсаны 10 жилийн ойд зориулсан Улс, аймгийн алдар цолтой 256 бөхийн барилдаан тус тус болно.

Сонирхуулахад Монгол Бөхийн өргөөний үзэгчдийн нэгдүгээр эгнээний суудлыг бүтэн жилээр эзэмших эрхийн нээлттэй захиалга зарлажээ. Энэхүү эрхийг эзэмшсэнээр 38-42 удаагийн бөхийн барилдаан, 20-28 удаагийн урлагийн тоглолт үзнэ. Мөн халуун хүйтэн уух зүйлс үнэгүй. Бүтэн жилийн эрхтэй тасалбарын үнэ 3 сая төгрөг аж. Суудлын байрлалыг захиалга өгсөн хугацааны дарааллаар сонгоно. Захиалгаа 94602108 дугаараар өгөх боломжтой юм байна.

А.Сүх