Хөгжлийн банктай холбоотой Нотлох баримтыг шинжлэн судлах хоёр дахь шатны сонсгол үргэлжилж байна. 

Өнөөдрийн сонсголоор Улсын төсвөөс эргэн төлөгдөх нөхцөлтэйгөөр санхүүжүүлсэн төсөл, арга хэмжээний хэрэгжилтийн талаар хэлэлцэж байна. 

Энэ үеэр УИХ-ын гишүүн Б.Энхбаяр гэрч Эдийн засгийн хөгжлийн яамны сайд асан Н.Батбаяраас асуулт асууж, хариулт авлаа.

Б.Энхбаяр: Эдийн засгийн хөгжлийн яамны сайдын эрхлэх асуудлын хүрээнд Хөгжлийн банк ажиллаж байсан. 2011 оны сүүлээр манай улс дэлхийд гайхагдаж байсан.  Азийн Дубай болох нь гэж хөрөнгө оруулагчид Монгол руу хошуурч байсан. Энэ хугацаанд Чингис бондын 1.5 тэрбум хүртэлх ам.доллар орж ирсэн. Юунд зарцуулсан бэ? Хөгжлийн төсөл байсан юм уу? Гэнэт бэлэн мөнгөтэй болоод юунд зарцуулах вэ гэдгээ мэдээгүй юм биш үү? 

Н.Батбаяр: Сонсголд оролцох хүсэлт ирүүлсний дагуу хүрэлцэн ирсэн. Өмнөх сонсголд гэрчээр дуудсан боловч ирээгүй гэх ташаа мэдээлэл олон нийтэд өгсөн. Надад албан ёсоор мэдэгдэл өгөөгүй. Мэдэгдэх нь битгий хэл утсаар яриагүй. Үүнд залруулга хийж өгөхийг хүсэж байна. 

Б.Энхбаяр: Ажлын албанаас тодруулж байж, танд хариу хэлье. Та асуултандаа хариулж бай. 

Н.Батбаяр: Өнөөдөр танай ажлын албаны 11 гишүүнээс дөрөв нь сууж байна. Ирц 50 хувьдаа хүрч байж зохион байгуулах ёстой. 

Б.Энхбаяр: Улсын Их Хурлын түр хорооны сонсгол дэгд зааснаараа, анхны ирцээрээ явах дэгтэй. Анх бүрдүүлсэн ирцээрээ үргэлжилж байгаа. Танд шүүлгэх гэж түр хороо ажлаагүй. Асуултандаа хариул. Та шинэ параламент бүрдэх үед шантааж хийж сайд болсон асуудал бий. Ингэж байж Хөгжлийн банкыг харъяандаа авсан. Энэ асуудалд тайлбар өг. 

Н.Батбаяр: Түр хороо ирц хүрэхгүйгээр хуралдаан зохион байгуулж байгаа нь хууль зөрчиж байна. Энэ хуралдааны үрд үн гарахгүйн улмаас таныг Үндсэн хуулийн цэцэд хандахыг анхааруулахыг хүсэж байна. Би тань шиг хурал зохион байгуулж байсан. Тиймээс мэднэ. 

Б.Энхбаяр: Та арван  жилийн өмнөх хуулийг яриад байх шиг байна. УИХ хурууны хээгээр бүртгэдэггүй байсан. Та нар таван гишүүний ирцээр Эрүүгийн хуулийг баталж байсан. Тэр сахилгагүй, дэггүй, шантааж хийж сайд болдог, шантааж хийж Хөгжлийн банкийг өөрийнхөө мэдэлд авдаг. Энэ үе чинь дууссан" гэв. 

Д.Батчулуун