Хөгжлийн банктай холбоотой Нотлох баримтыг шинжлэн судлах хоёр дахь шатны сонсгол үргэлжилж байна. 

Өнөөдрийн сонсголоор Сайншанд Аж үйлдвэрийн цогцолбор ТӨХХК, Зам, тээвэр хөгжлийн яам – “Шинэ төмөр зам” төсөл байгууллагуудтай холбоотой зээлийн асуудлуудыг нотлох баримтын хүрээнд шинжлэн судална. Нийт 39 гэрчийг гэрчээр дууджээ. 

Энэ үеэр УИХ-ын гишүүн Б.Энхбаяр гэрч Ерөнхийлөгч асан Х.Баттулгаас асуулт асууж, хариулт авлаа.

Ерөнхийлөгч асан Х.Баттулга: Энэ яг юу нь болохгүй болчихоод байгаа юм бэ. Би ерөөсөө ойлгохгүй байна. УИХ, ЗГ-ыг тогтоолууд он, цаг, өдрөөрөө гарчихсан. Оролцсон хүмүүс нь ингээд сууж байна. Энэ бидний хувьд анхны зүйл шүү дээ. Бид мэдэхгүй учир мэддэг байгууллагуудын хүмүүсийг хөлсөлж байгаа юм. Тэд мөнгөгүй бол хөдлөхгүй. Анх удаа боловсролуулах үйлдвэр гэдэг зүйлийн тухай яригдаж, би их гэгээлгээр ажлууд хийгээд явсан. Би үүгээр бахархдаг. Нилээд ажил хийгдсэн. Үүнийг цааш нь үргэлжүүлээд хийнэ гэж бодож байгаа.

Ерөнхийлөгчөөр ажиллаж байх хугацаандаа эдгээр ажлуудыг хийсэн. Тавантолгойгоос Сайншанд хүртэлх төмөр зам, авто зам, усны нөөцийн хайгуул гээд янз бүрийн зүйлсийг нь хийгээд, одоо хоёр тэрбум доллараар үнэлж болж байгаа юм.

Энэ хугацаанд Монгол Улс хоёр тэрбум доллар хийчихсэн шүү дээ. Энэ ажлыг хариуцаад хийвэл би бол босгочихно. Саяын яриад байгаа зүйлүүдийг чинь хоёр жил шалгасан. Зөндөө хүнийг шоронд хийсэн. 35 мянган га газарт шинжилгээ хийнэ гэдэг амар зүйл биш. Төмөр замаа хийсэн, авто замаа барьсан, усаа олчихсон. Одоо цахилгаанаа татчих юм бол хоёр тэрбум доллараас дээш хөрөнгө оруулалтаа хийчихсэн. Юун татан буулгах талаар яриад байгаа юм бэ.

Би бол энэ Ч.Хүрэлбаатарыг толгойлж хийсэн гэж бодож байна. Монгол орныг аж үйлдвэржүүлэх, ноос ноолуураа боловсруулах, газрын баялгаа боловсруулахыг жадлан эсэргүүцдэг хүн бол Ч.Хүрэлбаатар. Ердөө тав аравхан хүн байдаг" гэв. 

Д.Батчулуун