Улс хоорондын тээвэр, байнгын ачаа тээврийн тендер будилаантай, хууль бус байгаа талаар зөвлөх инженер Д.Батбаатар мэдээлэл өглөө.
Тэрбээр "Мэргэжлийн хүний хувьд үнийн санал, тээвэрлэлтийн хэмжээ, даац, тээврийн хэрэгслийн техникийн өгөгдөл, хэн сонгон шалгаруулж, хэн шалгарч цааш явах вэ, тээврийн ерөнхий гэрээг нягтлах гэх мэт дүн шинжилгээг хийлээ. Хуульд зааснаар улс хоорондын тээврийн зохицуулах эрх нь Зам тээврийн яамд бий. Энэхүү эрхээ 2016 онд Авто тээврийн үндэсний төвд шилжүүлсэн.
Тендерт тонн, км-ээр үнийг заах ёстой байвал зөвхөн тонноор нь тооцно гэжээ. Давтамж хэд байх, нэг явалтаар үнээ тогтоох уу, ямар нэгэн төлөвлөлтгүй тендер зарлах боломжгүй.
Монгол Улсад давхар чиргүүлтэй ганцхан машин бий. Тэр нь машин тээвэрлэдэг чиргүүлтэй машин. Гэтэл тендерт нэг алдаа байсан нь давхар чиргүүлтэй тээврийн хэрэгсэл гэсэн нэршлийг дурджээ. Тендертээ Монголд байхгүй нэршилтэй машиныг зарлаад шалгаруулах нэрээр өөрсдөө сонгох нь буруу.
Монголд хүнд даацын MNS:65278, ердийн зам дээр явдаг стандарт MNS:4598 гэсэн Тээврийн хэрэгслийн хоёр стандарт бий. Манайд улс хооронд тээвэр хийдэг 490 компани бий. Тэдгээрийн нийт 29507 тээврийн хэрэгсэл байгаагаас 22 мянга гаруй нь Тавантолгой чиглэлд явдаг. Тиймээс шинээр авлигын нэгэн төрөл үүсээд байна. Би тээвэр зохицуулалтын салбарт 25 жил ажилласан туршлагатай. Анхны нүүрс тээвэр замдаа гарахад нь үдэж өгөөд хараад зогсож байсан хүн. Тиймээс энэ талаар шүгэл үлээх шаардлагатай байлаа" гэв.
Д.Батчулуун
