УИХ-ын гишүүдийн тоог 152 болгон өөрчлөх саналыг эрдэмтэд гаргаад байгаа. Математикийн шинжлэх ухаанд үндэслэн куб язгуураар тооцоолсон энэ аргыг олон улсад ч хэрэглэдэг байна. Эрдэмтдийн тооцоолон гаргасан энэ тоотой АН санал нэг байгаа юм. Харин “УИХ-ын гишүүдийн тоог нэмснээр улсын төсөвт ачаалал нэмэгдэж, зардал өснө” гэж үзэх хэсэг байна.

Энэ асуудалд АН-ын Ерөнхий нарийн бичгийн дарга Ч.Өнөрбаяр “Бид олон яам,агентлаг, ашиггүй ажилладаг төрийн өмчит компаниудаа цөөлөх ёстой. Харин парламентаа томруулах ёстой. Үүнд тийм ч их зардал орохгүй. Одоо парламентаа томруулж, нээлттэй болгох ёстой. Ингэснээр парламент гэдэг төр биш, хууль хүчний байгууллага биш, ард түмний төлөөлөл гэдгийг иргэд маань ойлгоно. УИХ-ын гишүүдийн тоог 152 болгоод Сонгуулийн тухай хуулиа бид бас өөрчлөх хэрэгтэй. Тойрог дээрээ 200 ухуулагч авдаг, баахан цалин пүнлүү өгдөг. Нэг нэр дэвшигч дор хаяж долоон зуугаас тэрбум төгрөг гаргадаг. Бүр ийм мөнгө гарга гээд аудитын тооцоо ч гаргачихсан байх шиг. Гэтэл ийм их мөнгийг залуу улс төрчид, эмэгтэйчүүд гаргаж чаддаггүй, нөгөө л нэг мөнгөтэй хэдэн хүн УИХ-д орж ирчихээд бэлэг сэлт тараагаад гүйгээд байна. Үүнийг бид халах ёстой” гэсэн тайлбарыг хийв. Үндсэн хуулиа өөрчилж, парламентын гишүүдийн тоог нэмэх хэрэгтэй гэдэг дээр улс төрийн намууд төдийгүй олон нийт ч санал нэгдэж байгаа юм.