Улсын Ерөнхий прокурор УИХ-ын гурван гишүүний бүрэн эрхийг түдгэлзүүлэн шалгах хүсэлтээ өнгөрсөн баасан гарагт өргөн барьсан. Прокуророос гишүүний бүрэн эрхийг түдгэлзүүлэх бичиг ирсэн тохиолдолд ажлын таван өдрийн дотор хэлэлцэн шийдвэрлэх хуулийн заалттай байдаг.

Энэ дагуу өчигдөр УИХ-ын гишүүний Халдашгүй байдлын дэд хороо хуралдаад УИХ-ын гишүүн Т.Аюурсайхан, Д.Бат-Эрдэнэ, Н.Наранбаатар нарын бүрэн эрхийг түдгэлзүүлэн шалгах прокурорын саналыг хүлээн авах нь зүйтэй гэсэн шийдвэр гаргасан.

Яг одоо УИХ-ын чуулганы нэгдсэн хуралдаанаар Дэд хороо болон Байнгын хороодын санал дүгнэлтийг хаалттай горимоор хэлэлцэж байна. Гурван гишүүний бүрэн эрхийг түдгэлзүүлэх эсэх хуралдаан эхлэхийн өмнө нээлттэй хэлэлцэх саналыг УИХ-ын дарга гаргажээ.

Улсын нууцад хамаарах асуудал биш учир нээлттэй горимоор хэлэлцье хэмээн Г.Занданшатар дарга санал гаргасан ч УИХ-ын чуулганы хуралдааны дэгийн тухай хуулийн 12.2, УИХ-ын тухай хуулийн 22.2-т заасан асуудлыг заасан асуудлыг нууцын зэрэглэлтэйгээр хаалттай горимоор хэлэлцэнэ гэсэн байдгийн дагуу боломжгүй гэсэн тайлбарыг Тамгын газраас ирүүлжээ.

О.Балдан-Очир