Монгол улсад суугаа Францын элчин сайд Сэбастиен Сүрүнтэй "Улаанбаатар" форумын талаарх сэтгэгдэл, цаашдын хамтын ажиллагааны талаар тодрууллаа.

-"Улаанбаатар" олон улсын хөрөнгө оруулалт, түншлэлийн форум болж, танай улсын зүгээс санамж бичигт гарын үсэг зурлаа. Энэхүү форумын талаар сэтгэгдлээ бидэнтэй хуваалцана уу. 

-Улаанбаатар хот бол Монгол улсын хүн амын тал гаруй хувь нь оршин суудаг хот. Мөн улсын томоохон их дээд сургуулиуд энд байрлаж байна. Түүнийг дагаад замын түгжрэлийн асуудал иргэдэд тулгамдаад байна.  Эдгээр асуудлуудыг цогцоор нь шийдвэрлэх үндэсний форум зохион байгуулагдлаа. Үүнд бидний зүгээс сэтгэл хангалуун байна. 

-Монгол улсад амьдарч байгаа учраас бидний л адил асуудлуудтай тулгарч байгаа байх. Өөрт тань энэ бүхэн хэрхэн мэдрэгддэг вэ?

-Улаанбаатар хотын иргэдийн адил агаарын бохирдол, түгжрэлийн асуудал ямар хэмжээнд хүрснийг  би бусдын адил мэдэрдэг. Аз болоход манай элчин сайдын яам хотын төвд байдаг учраас ихэнх уулзалтууддаа алхаад оччихдог. Гэхдээ өнөөдөр франц улсын зүгээс Улаанбаатарын түгжрэлийг бууруулахад бодитой хувь нэмэр оруулах санамж бичигт гарын үсэг зурж баталгаажуулсан.

Энэхүү дүүжин тээврийн төсөл Хархориноос-яармаг чиглэлийн 4км замыг холбоно. Иймээс нийслэлийн иргэдийн  замын түгжрэлд зориулах цагаас  40 минутыг хожиж, одоогийн түгжрэлийн хугацааг 3 дахин багасгана гэсэн үг.  Маш богино хугацаанд буюу энэ хооронд 11 минут зорчоод хүрэх газраа очно гэдэг хэмнэсэн цаг хугацаагаа өөрийн гэр бүл, үр хүүхэддээ зарцуулах боломж юм.

-Танай улсаас манай улсад хэрэгжүүлэхийг хүсэж байгаа өөр ямар төсөл, хөтөлбөр байна вэ? 

-Бид Монгол улстай сэргээгдэх эрчим хүчний асуудал дээр нь хамтран ажиллах эрмэлзэл, зорилготой байдаг.

Монгол улсын хувьд сэргээгдэх эрчим хүчний асуудал мөн л тулгамдаж буй. Эрчим хүчээр бие даасан, хараат бус болох хэрэгтэй.

Тиймээс бид сэргээгдэх эрчим хүчний төслүүдийг хэрэгжүүлснээр үнэтэй хувь нэмэр оруулна гэж бодож байна. 

М.ДЭВЭЭЖАРГАЛ